అమెరికా చమురు రాజధాని హ్యూస్టన్లోని ప్రవాస భారతీయులు ప్రతిష్టాత్మకంగా నిర్వహిస్తున్న హౌడీ-మోదీ కార్యక్రమంలో భారత్ను ఉద్దేశించి ప్రసంగించనున్నారు అమెరికా అధ్యక్షుడు డొనాల్డ్ ట్రంప్. భారత్, భారత సంతతి అమెరికన్ల గురించి సుమారు 30 నిమిషాల పాటు ఈ ప్రసంగం సాగనుంది. ట్రంప్ ప్రసంగంలో కీలక ప్రకటనలు ఉండే అవకాశం ఉందని.. దీని ద్వారా రెండు ప్రజాస్వామ్య దేశాల మధ్య సంబంధాలు మరింత బలోపేతమవుతాయని అమెరికా అధికారులు పేర్కొంటున్నారు.
రానున్న అధ్యక్ష ఎన్నికల్లో హ్యూస్టన్లోని ప్రవాస భారతీయుల మద్దతు పొందే లక్ష్యంతో ఈ భారీ కార్యక్రమానికి హాజరవుతున్నారు ట్రంప్. గతంలో ఎన్నడూ ఇలాంటి సభకు వెళ్లలేదు ఆయన.
100 నిమిషాల పాటు...
హౌడీ-మోదీ కార్యక్రమానికి హాజరవుతున్న ట్రంప్ ప్రఖ్యాత ఎన్ఆర్జీ మైదానంలో సుమారు 100 నిమిషాల పాటు ఉంటారని శ్వేతసౌధం శనివారం షెడ్యూల్ విడుదల చేసింది. కానీ ఆయన ప్రసంగం ఎంత సమయం వరకు ఉంటుందనే స్పష్టత ఇవ్వలేదు. గతంలో ట్రంప్ చేసిన వ్యాఖ్యల ప్రకారం సుమారు 30 నిమిషాలుగా ఉండొచ్చని అంచనా వేస్తున్నారు అధికారులు.
ప్రవాసుల మనుసు గెలిచేందుకే...
సుమారు 50 వేల మంది భారతీయ అమెరికన్ల మనసు గెలిచేందుకే అమెరికా అధ్యక్షుడు ట్రంప్ ఈ మెగా ఈవెంట్కు హాజరవుతున్నారని ఇండో-అమెరికన్ కమ్యూనిటీ నాయకుడు భారత్ బరాయ్ పేర్కొన్నారు. ఈ కార్యక్రమం 2020 అధ్యక్ష ఎన్నికల్లో ఆయనకు ఎంతగానో ఉపయోగపడుతుందని.. కార్యక్రమంలో పాల్గొనటం ద్వారా ట్రంప్ భారత సంతతి అమెరికన్ల ఓట్లు ఎక్కువ మొత్తంలో సాధిస్తారని అభిప్రాయపడ్డారు బరాయ్.
ఇదీ చూడండి: ప్రధాని హోదాను మరచి మోదీ ఏం చేశారో చూడండి...
