ప్రియమైన వారితో కలిసి అలా బయటకు వెళ్లి ఎంత కాలమైందో! సరదాగా కాసేపు బయట తిరుగుదామంటే కరోనా ఎక్కడ తగులుకుంటుందోనని భయం. రొమాంటిక్గా ఏ క్యాండిల్ లైట్ డిన్నరో... రెస్టారెంట్లో వేడివేడి బిర్యానో తిందామన్నా భయమే. ఇంకా ఎన్ని రోజులని ఇలా లెక్కలేసుకుంటూ కూర్చోవాలి. ఎప్పుడో ఓసారి బయటకు రావాల్సిందే, వెళ్లి తినాల్సిందే. కదా! మరి అలాంటప్పుడు ఎటువంటి జాగ్రత్తలు తీసుకోవాలి? కరోనాను ఇంటికి తీసుకెళ్లకుండా ఉండాలంటే ఏం చేయాలి?
ఇవి పాటించండి
కరోనా కాలంలో బయట భోజనం చేయడం రిస్క్ అయినప్పటికీ... కొన్ని జాగ్రత్తలు తీసుకుంటే ఈ ముప్పును తగ్గించవచ్చని నిపుణులు చెబుతున్నారు. వైరస్ నుంచి మనల్ని మనం కాపాడుకోవడానికి కొన్ని సలహాలు ఇస్తున్నారు. అమెరికాకు చెందిన వ్యాధి నియంత్రణ, నివారణ కేంద్రం(సీడీసీపీ) ఈ మేరకు పలు సూచనలు జారీ చేసింది. హోండెలివరీలకే ప్రాధాన్యం ఇవ్వాలని పేర్కొంది. అయితే రెస్టారెంట్లకు వెళ్లే వాళ్లు ప్రత్యేక జాగ్రత్తలు తీసుకోవాలని స్పష్టం చేసింది.
- రెస్టారెంట్ల లోపల వైరస్ ముప్పు ఎక్కువగా ఉంటుంది. వెంటిలేషన్ సరిగా ఉండదు కాబట్టి ఇండోర్ రెస్టారెంట్లు ప్రమాదకరం.
- రెస్టారెంట్లో భోజనం చేయాలని అనుకుంటే అవుట్డోర్ సీటింగ్ ఉన్న ప్రాంతాలు ఉత్తమం.
- టేబుళ్లకు మధ్య కనీసం 6 అడుగుల దూరం ఉండే రెస్టారెంట్లు చూసుకోవాలి.
- సురక్షితమైన ఆహారం అందించేందుకు రెస్టారెంట్లు తీసుకుంటున్న చర్యలను తెలుసుకోవాలి.
- సర్వర్లు మాస్కులు ధరిస్తున్నారా, లేదా చూసుకోవాలి.
- టేబుల్ కోసం ఎదురుచూసేటప్పుడు ఎక్కువ మంది గుమిగూడకుండా రెస్టారెంట్ తీసుకుంటున్న జాగ్రత్తలు పరిశీలించాలి.
- ఒకసారి వాడిపాడేసే పాత్రలు ఉపయోగించే రెస్టారెంట్లు ఉత్తమం.
- వస్తువులను తాకకుండా చేసే చెల్లింపు పద్ధతులు పాటించాలి.
- ఎక్కువ మంది ఉన్న చోట భోజనం చేయాల్సి వస్తే.. మీకు తెలిసినవారితోనే తినండి.
- చుట్టుపక్కల ఎవరికైనా అనారోగ్య లక్షణాలు ఉన్నాయో పరిశీలించుకోండి.
- తీవ్రమైన అనారోగ్యానికి గురయ్యే వ్యక్తులు, వృద్ధులు రెస్టారెంట్లలో భోజనం చేయకపోవడమే మంచిది.
