జనరలైజ్డ్ సిస్టమ్ ఆఫ్ ప్రిఫరెన్స్(జీఎస్పీ) సభ్య దేశాల నుంచి భారత్ను తొలగిస్తే అమెరికా నష్టపోక తప్పదని ఆ దేశ వాణిజ్య సంస్థలు రూపొందించిన నివేదికలో తేలింది. హోదా రద్దు చేస్తే ఏడాది కాలంగా వాణిజ్య యుద్ధంలో ఉన్న చైనాకే లబ్ధి చేకూరుతుందని తాజా నివేదిక స్పష్టం చేసింది. చైనాతో వాణిజ్య యుద్ధం కారణంగా ఇకపై అమెరికా సంస్థలు జీఎస్పీ దేశాలపైనే ఆధారపడాల్సిన పరిస్థితి ఏర్పడింది.
జీఎస్పీ అంటే...
జీఎస్పీ హోదా కల్గిన దేశాలు అమెరికాకు ఎలాంటి సుంకం లేకుండానే వస్తువులను ఎగుమతి చేసుకోవచ్చు. బదులుగా అమెరికా వ్యాపార సంస్థలకు వాణిజ్య అవకాశాలు కల్పించాల్సి ఉంటుంది.
జీఎస్పీ కారణంగా మార్చిలో అమెరికా సంస్థలకు 105 మిలియన్ డాలర్లు ఆదా అయినట్లు ఆ దేశ వాణిజ్య సంస్థలు నివేదికలో తెలిపాయి. గతేడాది మార్చి నెలతో పోల్చితే ఇది 36శాతం అధికం. 2019 మొదటి త్రైమాసికంలో ఈ విధానం ద్వారా అమెరికా కంపెనీలు 285 మిలియన్ డాలర్లు కూడబెట్టుకున్నాయి.
భారత్కు జీఎస్పీ హోదా రద్దు చేస్తున్నట్లు అమెరికా అధ్యక్షుడు డొనాల్డ్ ట్రంప్ మార్చి 4న ప్రకటించారు. 60 రోజుల నోటీసు వ్యవధి మే 3తో ముగిసింది.
వాణిజ్య వివాదంతో...
అమెరికాకు జీఎస్పీ దిగుమతుల విలువ 760 మిలియన్ డాలర్లకు పెరిగింది. ఇందులో 672 మిలియన్ డాలర్లు చైనా ఉత్పత్తులే ఉన్నాయి.
చైనా నుంచి దిగుమతి చేసుకునే వస్తువులపై సుంకాలు పెంచుతున్నట్లు ట్రంప్ ఇటీవల ప్రకటించారు. ఫలితంగా చైనా నుంచి దిగుమతి చేసుకునే వస్తువుల సంఖ్య భారీగా తగ్గింది.
భారత్తో పాటు, టర్కీ, థాయిలాండ్, ఇండోనేసియాకు జీఎస్పీ హోదా రద్దుపై పునరాలోచించాలని అమెరికా వ్యాపార సంస్థలు ట్రంప్ ప్రభుత్వానికి సూచిస్తున్నాయి. చైనా వస్తువులపై సుంకాలు పెంచి భారత్కు జీఎస్పీ హోదా రద్దు చేస్తే ప్రయోజనం ఉండదని వాదిస్తున్నాయి. అలా జరిగితే చైనాకే మేలు జరుగుతుందని హెచ్చరిస్తున్నాయి.
భారత్కు జీఎస్పీ హోదా కొనసాగిస్తే చైనా వస్తువులకు ప్రత్యామ్నాయంగా మారుతుందని వ్యాపార సంస్థలు భావిస్తున్నాయి.
ఇదీ చూడండి: వాణిజ్య యుద్ధం: ఫెడరల్ బ్యాంకు సాయం కోరిన ట్రంప్
