కరోనా నుంచి వేగంగా కోలుకునేందుకు సహాయపడుతోన్న యాంటీ వైరల్ వ్యాక్సిన్ రెమ్డెసివిర్ అత్యవసర వినియోగానికి అమెరికా ఆహార, ఔషధ నియంత్రణ విభాగం (ఎఫ్డీఏ) అనుమతించింది.
ప్రముఖ ఔషధ సంస్థ గిలియాడ్ సైన్సెస్ అభివృద్ధి చేసిన రెమ్డెసివిర్ వ్యాక్సిన్.. కరోనా రోగులు వేగంగా కోలుకునేందుకు ఉపయోగపడుతుందని భారతీయ అమెరికన్ వైద్యులు అరుణ సుబ్రమణియన్ నేతృత్వంలోని బృందం తేల్చింది. ఈ ఔషధం వినియోగించటం ద్వారా కొవిడ్-19 బాధితులు కోలుకునే సమయం 31 శాతం(4 రోజులు) మేర తగ్గినట్లు వెల్లడించింది. ఈ నేపథ్యంలో రెమ్డిసివిర్ ఔషధాన్ని ఉపయోగించేందుకు ఎఫ్డీఏ పచ్చజెండా ఊపింది.
" రెమ్డెసివిర్ వ్యాక్సిన్ అత్యవసర వినియోగానికి అనుమతి లభించింది. ఈ ఔషధాన్ని త్వరితగతిన వినియోగంలోకి తెచ్చేందుకు మా అధికార బృందాలు.. ఎఫ్డీఏ, జాతీయ ఆరోగ్య విభాగం, గిలియాడ్తో కలిసి పనిచేస్తాయి. "
- డొనాల్డ్ ట్రంప్, అమెరికా అధ్యక్షుడు
ఈ ఔషధాన్ని వినియోగించటం ద్వారా సాధారణ చికిత్స తీసుకునే వారు (15 రోజులు) తో పోల్చితే 11 రోజుల్లోనే కోలుకునేందుకు వీలుపడుతోందని నిపుణులు అభిప్రాయపడుతున్నారు. మరణాల రేటు తగ్గుతుందని భావిస్తున్నా... ప్రస్తుతం పూర్తిస్థాయిలో దీనికి ఆధారాలు లేవని చెప్పారు.
ఎఫ్డీఏ అనుమతుల నేపథ్యంలో.. ప్రస్తుతం తమ వద్ద ఉన్న స్టాక్ను విరాళంగా ఇస్తున్నట్లు ప్రకటించింది గిలియాడ్. ఉత్పత్తిని వేగవంతం చేయనున్నట్లు తెలిపింది.
