అమెరికా అధ్యక్ష భవనం శ్వేతసౌధానికి వచ్చిన పార్సిల్లో విషం ఉన్నట్లు అధికారులు గుర్తించారు. రిసిన్ అనే విష పదార్థాన్ని ఎన్వలప్లో లభించినట్లు తెలిపారు. అధ్యక్షుడు డొనాల్డ్ ట్రంప్ చిరునామాతో వచ్చిన ఈ కవర్ను అడ్డుకున్నట్లు స్పష్టం చేశారు.
ఇందులో ఉన్నది రిసిన్ అనే ప్రమాదకర విషమేనని ప్రాథమిక విచారణలో తేలిందని అధికారులు చెప్పారు. రెండు పరీక్షల్లోనూ ఇదే విషయం వెల్లడైనట్లు పేర్కొన్నారు. ఈ విషం సాధారణంగా ఆముద గింజల్లో లభ్యమవుతుందని వెల్లడించారు.
ఈ ప్యాకెట్ ఎక్కడి నుంచి వచ్చిందనే విషయంపై దర్యాప్తు కొనసాగుతోంది. ఎఫ్బీఐ, సీక్రెట్ సర్వీస్, యూఎస్ పోస్టల్ ఇన్స్పెక్షన్ సర్వీసులు సంయుక్తంగా దీనిపై విచారణ ప్రారంభించాయి. ఇది కెనడా నుంచి వచ్చి ఉండొచ్చని అధికారులు అనుమానిస్తున్నారు.
రిసిన్తో మరణమే!
ఆముదాల నుంచి తయారు చేసే అత్యంత విషపూరితమైన పదార్థమే రిసిన్. దీన్ని ఉగ్రవాద దాడులలో తరచుగా ఉపయోగిస్తారు. పౌడర్, గుళికలు, యాసిడ్ రూపంలో దీన్ని ప్రయోగిస్తారు. ఈ విషాన్ని స్వీకరిస్తే వాంతులు, కడుపులో రక్తస్రావం వంటివి తలెత్తుతాయి. కిడ్నీలు, కాలేయం, ప్లీహం వంటి అవయవాలు వైఫల్యానికి గురై ప్రాణాలు కోల్పోయే ప్రమాదం ఉంటుంది.
