అమెరికా అధ్యక్ష ఎన్నికలు వాయిదా పడాలని తాను కోరుకోవడం లేదని ఆ దేశాధ్యక్షుడు డొనాల్డ్ ట్రంప్ వెల్లడించారు. అయితే మెయిల్-ఇన్ ఓటింగ్ లెక్కింపు మాత్రం కొన్ని వారాల సమయం పట్టొచ్చని, దీని వల్ల ఫలితాల్లో అవకతవకలు జరగొచ్చని పేర్కొన్నారు. నవంబర్ 3న జరగనున్న ఎన్నికలు కాస్త ఆలస్యంగా జరగొచ్చన్న తన ట్వీట్పై రాజకీయ దుమారం చెలరేగడం వల్ల ఈ మేరకు వ్యాఖ్యానించారు ట్రంప్.
"ఎన్నికలను వాయిదా వేయాలని నాకు లేదు. ఎన్నికలు జరగాలని నాకూ ఉంది. అదే సమయంలో మూడు నెలలు వేచిచూసి.. బ్యాలెట్లు కనపడటం లేదని తెలుసుకోవాలని నాకు లేదు."
--- డొనాల్డ్ ట్రంప్, అమెరికా అధ్యక్షుడు.
మెయిల్-ఇన్ ఓటింగ్లో అవకతవకలు జరగవచ్చని ట్రంప్ ఆరోపిస్తున్నారు. అధ్యక్ష ఎన్నికల్లో విదేశీ శక్తులు జోక్యం చేసుకోవడానికి ఇదొక సులభమైన మార్గమని అభిప్రాయపడ్డారు.
అయితే డెమొక్రాట్లు మాత్రం మెయిల్-ఇన్ ఓటింగ్కే పట్టుబడుతున్నారు. కరోనా సంక్షోభం వెంటాడుతున్న నేపథ్యంలో భారీ స్థాయిలోని అమెరికన్లు కూడా పోలింగ్ బూత్లకు బదులు ఈ మెయిల్-ఇన్ ఓటింగ్వైపే మొగ్గుచూపే అవకాశముంది.
'నేనే గెలుస్తా...'
అధ్యక్ష ఎన్నికల కోసం అందరికన్నా ఎక్కువగా తానే ఎదురుచూస్తున్నట్టు తెలిపారు ట్రంప్. తనకు వ్యతిరేకంగా వస్తున్న పోల్స్ అసత్యమని.. ఈసారి కూడా కచ్చితంగా తానే గెలుస్తానని మరోమారు ధీమా వ్యక్తం చేశారు.
ఇదీ చూడండి:- భారత్-చైనాకు ఆ విషయం పట్టదు: ట్రంప్
