కరోనా మహమ్మారిని కట్టడి చేసేందుకు తమ శాయశక్తులా కృషి చేస్తున్నారు వైద్యులు. వైరస్ ప్రభావం తీవ్రంగా ఉన్న అగ్రరాజ్యం అమెరికాలో ఇప్పుడు వైద్య సిబ్బంది సేవలను ప్రతి ఒక్కరు ప్రశంసిస్తున్నారు. కాలిఫోర్నియాలోని సాంటా క్రూజ్లో ఓ అజ్ఞాతవ్యక్తి మాత్రం వైద్యసిబ్బందికి ఏదైనా కానుక ఇవ్వాలనుకున్నాడు. స్థానిక ఆస్పత్రికి ఒక మిలియన్ డాలర్లను విరాళంగా ఇచ్చాడు.
'దేశ ప్రజల క్షేమం కోసం మీరు చేస్తున్న సేవలకు ధన్యవాదాలు' అని విరాళంతో పాటు ఓ నోట్ను ఉంచారు గుర్తు తెలియని వ్యక్తి. అహర్నిశలు శ్రమిస్తున్న తమకు మానవతా దృక్పథంలో ఆ వ్యక్తి చేసిన సాయం సంతోషాన్నిస్తోందని ఆస్పత్రి సిబ్బంది చెప్పారు.
ఈ కానుకను ఆస్పత్రి వైద్య, సహాయ సిబ్బంది అందరం పంచుకుంటామని, వారి నైపుణ్యాలకు లభించిన బహుమానంగా దీనిని స్వీకరిస్తున్నట్లు డొమినికన్ ఆస్పత్రి ప్రెసిడెంట్ డా.ననిట్టి మికీవిజ్ తెలిపారు. వైద్య సిబ్బందికే ఎక్కువ ప్రశంసలు దక్కుతున్నా, ఆస్పత్రిని శుభ్రంగా ఉంచే సహాయ సిబ్బంది, భద్రతా సిబ్బంది, ల్యాబ్ టెక్నీషియన్స్ లేకపోతే మెరుగైన సేవలు అందించడం సాధ్యం కాదన్నారు.
మిలియన్ డాలర్ల విరాళాన్ని ఆస్పత్రి సిబ్బందికి బోనస్గా ఇవ్వనున్నారు. ఏడాది కాలంగా అక్కడ పనిచేస్తున్న ఫుల్టైమ్ సిబ్బందికి 800 డాలర్లు, పార్ట్ టైమ్ సిబ్బందికి 600 డాలర్లు కానుకగా లభించనుంది.
