క్యూబా జాతీయ జంతుప్రదర్శనశాలలో ఓ బంగాల్ టైగర్.. నాలుగు పిల్లలకు జన్మనిచ్చింది. ఆ పిల్లల్లో ఒకటి పూర్తి తెలుపులో రంగులో ఉండటం విశేషం. మార్చి 12న ఫియోనా అనే పులి.. నాలుగు పిల్లలకు జన్మనిచ్చినట్లు అధికారులు తెలిపారు. అనంతరం.. 10 రోజుల పాటు వీటిని నిరంతర పర్యవేక్షణలో ఉంచినట్లు చెప్పారు.
ఈ పిల్లలకు తల్లి ఫియోనా కాగా.. తండ్రి గార్ఫీల్డ్ అనే మగ పులి. ఇప్పటివరకు ఈ పులి పిల్లలను ఎవరూ తాకనందున అవి ఆడవా? మగవా? అనే దానిపై స్పష్టత లేదు. వాటి బరువు ఎంతో కూడా ఎవరికీ తెలియదు. అయితే.. ఫియోనా ప్రసవించేటప్పుడు గమనించిన పులుల సంరక్షులకు.. ఆ పిల్లల్లో ఒకటి పూర్తి తెలుపు రంగు తోలుతో, నీలి రంగు కళ్లతో ఉన్నట్లు తెలిసింది.
ఆరునెలల తర్వాత..
ఇంకో ఆరు నుంచి ఏడు నెలల తర్వాత ఈ పులి పిల్లలకు సంబంధించిన పూర్తి వివరాలు తెలుస్తాయని నిపుణులు పేర్కొన్నారు. కాగా.. ప్రపంచవ్యాప్తంగా 200 తెల్లపులులు మాత్రమే ఉన్నాయి. 300 హెక్టార్ల విస్తీర్ణంలో ఉన్న క్యూబా జాతీయ పార్కులో 1,400 జంతువులు ఉన్నాయి.
