చైనాపై ఆంక్షలు విధించేందుకు అధ్యక్షుడికి అధికారం ఇవ్వాలని అమెరికా ప్రతినిధుల సభలో 9 మంది కీలక సెనేటర్లు ఓ బిల్లును ప్రవేశపెట్టారు. కరోనా విపత్తుకు సంబంధించి చైనా జవాబుదారీగా వ్యవహరించకపోతే ఈ చర్యలు తీసుకునేలా 'ద కొవిడ్-19 అకౌంటబిలిటీ' ప్రతిపాదనకు ఆమోదం తెలపాలని లిండ్సే గ్రహమ్ నేతృత్వంలోని ఈ సెనేటర్ల బృందం కోరింది.
"చైనా కమ్యూనిస్టు పార్టీ ప్రమేయం లేకుండా అమెరికాకు వైరస్ వచ్చి ఉండేది కాదు. వుహాన్ ల్యాబ్లో దర్యాప్తు చేసేందుకు అంతర్జాతీయ సమాజానికి చైనా అనుమతి ఇవ్వటం లేదు. ఈ వైరస్ వ్యాప్తి ఎలా మొదలైందన్న విషయాన్ని తెలుసుకునేందుకు పరిశోధకులనూ రానివ్వటం లేదు. ఇటువంటి చర్యలు తీసుకోకుండా చైనా మాట వినదు. విచారణకు అంగీకరించే వరకు ఈ కఠిన ఆంక్షలు చైనాను ఇబ్బంది పెడుతూనే ఉంటాయి."
- లిండ్సే గ్రహమ్, అమెరికా సెనేటర్
కరోనా మహమ్మారి ప్రపంచమంతా విస్తరించటంపై చైనా కమ్యూనిస్టు పార్టీ బాధ్యత వహించాలని లిండ్సే డిమాండ్ చేశారు. వెట్ మార్కెట్ల వల్ల అనేక రకాల అంటు వ్యాధులు ప్రబలుతున్నాయని.. వాటిని మూసివేయాల్సిందేనని ఆయన అన్నారు.
ఈ ప్రతిపాదన ప్రకారం..
అమెరికా దాని మిత్ర దేశాలు లేదా ఐరాస అనుబంధ సంస్థలతో కరోనా వ్యాప్తికి సంబంధించి ఏదైనా విచారణకు చైనా అంగీకరించాలి. ఈ విచారణలో తేలిన విషయాలకు చైనా జవాబుదారీగా ఉండాలి. వైరస్ వ్యాప్తికి కారణమవుతోన్న చైనాలోని అన్ని వెట్ మార్కెట్లు (వన్యప్రాణి మాంస విక్రయశాలలు) మూసివేయాలి. అమెరికా అధ్యక్షుడి ధ్రువీకరణ తర్వాత విచారణకు సంబంధించి పూర్తి వివరాలు అమెరికా కాంగ్రెస్కు సమర్పించాలి. ఈ తతంగమంతా 60 రోజులలోపు జరగాలి.
ఒకవేళ ఈ ప్రక్రియలో విఫలమైతే చైనాపై ఆంక్షలు విధించేందుకు అధ్యక్షుడికి అధికారం లభిస్తుంది. ఆస్తులను స్తంభింపజేయటం, ప్రయాణాలపై నిషేధం, వీసా రద్దు, చైనా వ్యాపారాలకు అమెరికా బ్యాంకుల రుణాల నిరాకరణ, అమెరికా స్టాక్ మార్కెట్ల నుంచి చైనా కంపెనీల తొలగింపు వంటి చర్యలు తీసుకోవచ్చు.
ఇదీ చూడండి: '20 ఏళ్లలో చైనా నుంచి 5 మహమ్మారులు'
