భారత్లో కరోనా మహమ్మారి కారణంగా జీవనోపాధి కోల్పోయిన అసంఘటిత రంగ కార్మికులు, ఇతర బలహీన వర్గాలకు సాయం చేయాలని నిర్ణయించింది అమెరికా. అందుకోసం 1.9 మిలియన్ డాలర్లు (13.90 కోట్లు) ఆర్థిక సాయం అందించనుంది.
అమెరికా అంతర్జాతీయ అభివృద్ధి సంస్థ(యూఎస్ఏఐడీ) ద్వారా ఈ సాయం అందిస్తున్నట్లు భారత్లో అమెరికా రాయబారి కెన్నెత్ ఐ జస్టర్ తెలిపారు.
"నిరుద్యోగం, ఆదాయ అంతరాల వల్ల కార్మికులు ఎదుర్కొంటున్న సమస్యల పరిష్కారానికి సంహిత కలెక్టివ్ గుడ్ ఫౌండేషన్ నెలకొల్పిన 'రివైవల్ అలయన్స్'కు యూఎస్ఏఐడీ నిధులు మద్దతుగా నిలుస్తాయి. స్వయం ఉపాధిదారులకు, నానో, సూక్ష్మ పరిశ్రమలు నిలదొక్కుకునేందుకు రుణాలు, గ్రాంట్స్ రూపంలో తొలిదశలో 6.85 మిలియన్ డాలర్లు అందించనుంది ఈ అలియన్స్."
-అమెరికా రాయబార కార్యాలయం
దేశంలోని సుమారు 60,000-1,00,000 వరకు కార్మికులు, చిన్న సంస్థలకు సాయం అందనుంది. ఇందులో ముఖ్యంగా యువత, మహిళలకు ప్రాధాన్యం ఇవ్వనున్నారు. రివైవ్ అలియన్స్ ద్వారా యువత, కార్మికులకు నైపుణ్యాభివృద్ధి కార్యక్రమాలు చేపట్టనున్నట్లు రాయబార కార్యాలయం తెలిపింది.
ఇదీ చూడండి: మహమ్మారుల్లో కరోనాతోనే అత్యధిక మరణాలు: ఐరాస
