ఆసియా అమెరికన్లపై దేశంలో జరుగుతున్న దాడులకు వ్యతిరేకంగా రూపొందించిన బిల్లును అమెరికా కాంగ్రెస్ ఆమోదించింది. విద్వేషపూరిత నేరాలు, జాత్యహంకార చర్యలను అరికట్టే విధంగా ఈ బిల్లును రూపొందించారు. ఎగువసభ సెనేట్ గత ఏప్రిల్లోనే ఈ బిల్లును 94-1 ఓట్ల తేడాతో ఆమోదించింది. తాజాగా 364-62 ఓట్ల తేడాతో ప్రతినిధుల సభ గడప దాటింది.
ఈ బిల్లు ద్వారా ఆసియా అమెరికన్లపై జరుగుతున్న దాడుల నివారణ కోసం స్థానిక యంత్రాంగాలకు నిధులు సమకూరనున్నాయి. విద్వేషపూరిత నేరాలపై దర్యాప్తు చేసేందుకు, ఇలాంటి దాడులను గుర్తించేందుకు మరింత వెసులుబాటు కలగనుంది. ఉభయసభల ఆమోదం పొందిన ఈ బిల్లును అధ్యక్షుడు జో బైడెన్కు పంపనున్నారు. దీనిపై సంతకం చేస్తానని ఇప్పటికే బైడెన్ స్పష్టం చేశారు.
'మనసుల్లోని ద్వేషం మాపదుగా..'
ఈ బిల్లు ఆమోదం పట్ల చట్టసభ్యులు హర్షం వ్యక్తం చేశారు. కరోనా సమయంలో విద్వేషపూరిత ఘటనలు ఎదుర్కొన్నవారికి ఈ బిల్లు ద్వారా సంఘీభావం ప్రకటించినట్లైందని సెనేట్ మెజారిటీ లీడర్ చక్ షూమర్ పేర్కొన్నారు.
ఈ బిల్లు ఆమోదించేందుకు ఉభయసభలు ఏకతాటిపైకి రావడం స్వాగతించదగినదని రిపబ్లికన్ ప్రతినిధి యంగ్ కిమ్ పేర్కొన్నారు. అయితే ప్రజల మనసుల్లో ఉన్న విద్వేషాన్ని ఈ బిల్లు రూపుమాపదన్న విషయాన్ని గుర్తించాలని అన్నారు.
ఇదీ చదవండి: అమెరికాలో కాల్పులు-ఇద్దరు మహిళలు మృతి
