'దలైలామా వారసుడి ఎంపికలో చైనా జోక్యం చేసుకోవద్దు'

దలైలామా వారసుడి ఎంపికలో చైనా జోక్యం చేసుకోవద్దని అమెరికా మరోమారు స్పష్టం చేసింది. ఇందుకు సంబంధించిన బిల్లును మాజీ అధ్యుక్షుడు ట్రంప్​ హయాంలోనే రూపొందించిన అగ్రరాజ్యం.. ఆ విధానాలనే పాటించనున్నట్లు తాజాగా ప్రకటించింది.

బౌద్ధమత గురువు దలైలామా వారసుడి ఎంపిక విషయంలో చైనా ప్రభుత్వం జోక్యం చేసుకోవద్దని అగ్రరాజ్యం అమెరికా తేల్చి చెప్పింది. ఈ మేరకు ఆ దేశ విదేశాంగ శాఖ అధికార ప్రతినిధి నెడ్​ ప్రిన్స్​ ప్రకటన విడుదల చేశారు.

'25 ఏళ్ల క్రితం పంచెన్​ లామా వారసుని ఎంపిక విషయంలో చైనా జోక్యం చేసుకోవడం, ఆ తర్వాత చిన్నతనంలోనే పంచెన్​లామా అదృశ్యమవడం, అతని స్థానంలో తమ ప్రభుత్వం ఎంపిక చేసిన వ్యక్తిని పంచెన్​లామాగా ప్రకటించేందుకు చైనా ప్రయత్నించడం మతపరమైన స్వేచ్ఛకు విఘాతం కల్గించడమే' అని ప్రకటన తెలిపింది.

ఇదీ చూడండి: 'బాల లామా' కోసం చైనా వేట- రంగంలోకి అమెరికా..!

చైనా జోక్యం లేకుండా దలైలామా వారసుడి ఎంపిక స్వతంత్రంగా జరగాలని మాజీ అధ్యక్షుడు డొనాల్డ్ ట్రంప్ హయాంలోనే బిల్లు తీసుకొచ్చింది అమెరికా. దీని ద్వారా టిబెట్​లో అమెరికా కాన్సులేట్​ను ఏర్పాటు చేసి అంతార్జాతీయ కూటమిని ప్రతిపాదించింది. 15వ దలైలామా ఎంపికలో జోక్యం చేసుకునే చైనా అధికారులపై ఆంక్షలు విధించేలా విధానాలు రూపొందించింది. ఇప్పుడు బైడెన్ ప్రభుత్వమూ ఆ విధానాలనే పాటిస్తోంది.

ఇదీ చూడండి: అమెరికా చట్టం- చైనాకు 'టిబెట్​' సంకటం