అమెరికా అధ్యక్ష ఎన్నికల ప్రచారం ముమ్మరంగా సాగుతోంది. ప్రస్తుత అధ్యక్షుడు, రిపబ్లికన్ అభ్యర్థి డొనాల్డ్ ట్రంప్, డెమొక్రటిక్ పార్టీ అభ్యర్థి జో బైడెన్ హోరాహోరీగా తమ ప్రచారాల్లో బిజీగా ఉన్నారు. ఈ నేపథ్యంలో కీలక వ్యాఖ్యలు చేశారు అమెరికా జాతీయ భద్రతా సలహాదారు(ఎన్ఎస్ఏ) రాబర్డ్ ఓబ్రెయిన్. చైనా, ఇరాన్, రష్యా కలిసి అమెరికా ఎన్నికలను నీరుగార్చాలని చూస్తున్నట్లు ఆయన అభిప్రాయపడ్డారు.
"అమెరికాను రాజకీయంగా ప్రభావితం చేయడానికి చైనా ప్రణాళిక వేస్తున్నట్లు నిఘా వర్గాలు స్పష్టంగా చెబుతున్నాయి. దీనితో పాటు ఇరాన్, రష్యా ఈ జాబితాలో ఉన్నాయి. మూడు దేశాలు కలిసి ఎన్నికలకు అంతరాయం కలిగించాలని ప్రయత్నిస్తున్నారు. కొందరు బైడెన్ను కోరుకుంటున్నారు. మరికొంతమంది ట్రంప్వైపు ఉన్నామని చెబుతున్నారు. ఈ దేశాలకు కావాల్సింది ఏంటో తెలియట్లేదు. కానీ అమెరికాలో ఎన్నికలు స్వేచ్ఛగా, న్యాయబద్ధంగా జరగకుండా అడ్డుకోవాలన్న ప్రయత్నాలను ఎవరైనా ఆపేయాల్సిందే"
-- ఓబ్రెయిన్, అమెరికా జాతీయ భద్రతా సలహాదారు
మెయిల్ ఇన్ బ్యాలెట్ల అంశం పైనా ఓబ్రెయిన్ స్పందించారు. విదేశీ వ్యక్తులు ఎన్నికలను ప్రభావితం చేయకుండా వాటిపై కొన్ని నిబంధనలు విధించనున్నట్లు ఆయన తెలిపారు. రష్యా, అమెరికా, ఇరాన్ ఏదైనా చర్యలకు పూనుకొని ఎన్నికలను ప్రభావితం చేయాలనుకుంటే.. అందుకు మూల్యం చెల్లించుకోకతప్పదని ఆయన హెచ్చరించారు. అమెరికన్ టెక్నాలజీ సంస్థలైన ఫేస్బుక్, ట్విట్టర్ సహా ఇతర సంస్థలు చాలా ఎన్నికల పోస్టులపై జాగ్రత్త వహిస్తున్నట్లు తెలిపారు.
నవంబర్ 3న అమెరికా అధ్యక్ష ఎన్నికలు జరగనున్నాయి. రెండోసారి అధ్యక్ష పదవి చేపట్టాలని పట్టుదలతో ఉన్నారు ట్రంప్. ప్రత్యర్థి, డెమొక్రాట్ అభ్యర్థి బైడెన్వైపు ప్రజలు మొగ్గు చూపుతున్నట్లు ఇటీవలే కొన్ని సర్వేలు వెల్లడించాయి. అయితే గత రెండు వారాలుగా ప్రచారాల జోష్తో ట్రంప్ మళ్లీ జోరుమీదున్నట్లు తెలుస్తోంది.
