ఎంతో మంది ప్రాణాలను బలిగొన్న కరోనా వైరస్ను అరికట్టేందుకు చైనా తీవ్రంగా శ్రమిస్తోందని అమెరికా అధ్యక్షుడు డొనాల్డ్ ట్రంప్ కొనియాడారు. వారికి ఎలాంటి సాయం చేయడానికైనా అమెరికా సిద్ధంగా ఉందని హామీ ఇచ్చారు.
"చైనా చాలా కష్టపడుతోంది. శుక్రవారం రాత్రి కరోనా వైరస్కు సంబంధించి జిన్పింగ్తో సంభాషించాను. వారు తమ వృత్తిని కర్తవ్యంతో నిర్వర్తిస్తున్నారని భావిస్తున్నాను."
డొనాల్డ్ ట్రంప్, అమెరికా అధ్యక్షుడు
కరోనా వైరస్ కారణంగా శుక్రవారం నాటికి మృతుల సంఖ్య 722కు చేరింది. దాదాపు 34 వేలకుపైగా కేసులు నమోదైనట్లు చైనా వైద్య అధికారులు తెలిపారు.
మరోవైపు అమెరికాలో 12 కరోనా వైరస్ కేసులను గుర్తించినట్లు అమెరికా ఆరోగ్యశాఖ మంత్రి అలెక్స్ అజర్ పేర్కొన్నారు. చైనాకు సాయపడేందుకు ప్రపంచ స్థాయి నిపుణులను పంపిచేందుకు అమెరికా సిద్ధంగా ఉందని అజర్ తెలిపారు.
అమెరికా పౌరుడి మృతి
కరోనా వైరస్ కారణంగా చైనాలోని వుహాన్లో అమెరికాకు చెందిన పౌరుడు శనివారం మృతి చెందినట్లు అగ్రరాజ్య రాయబార కార్యాలయం తెలిపింది.
ఇదీ చూడండి:ఆడియో క్లిప్పులపై యడియూరప్పకు సుప్రీం షాక్!
