అమెరికా చరిత్రలో నూతన శకం ఆరంభమైంది. అగ్రరాజ్య 46వ అధ్యక్షుడిగా జో బైడెన్ ప్రమాణస్వీకారం చేశారు. వాషింగ్టన్ క్యాపిటల్ హిల్కు పశ్చిమం వైపు ఈ కార్యక్రమం జరిగింది. ప్రతిసారి వేలాది మంది సమక్షంలో ఘనంగా జరిగే ఈ ప్రమాణ స్వీకారోత్సవం.. ఈసారి కరోనా, ఇతర భద్రతా కారణాల దృష్ట్యా నిరాడంబరంగా సాగింది.
బైబిల్పై ప్రమాణం..
అమెరికా కాలమానం ప్రకారం మధ్యాహ్నం 12గంటలకు.. సుప్రీంకోర్టు ప్రధాన న్యాయమూర్తి జస్టిస్ జాన్ రాబర్ట్స్.. 78ఏళ్ల బైడెన్ చేత ప్రమాణస్వీకారం చేయించారు. తన కుటుంబానికి చెందిన 127ఏళ్ల బైబిల్పై ప్రమాణం చేశారు బైడెన్. ఆ సమయంలో బైబిల్ను ఆయన భార్య జిల్ బైడెన్ పట్టుకున్నారు.
అమెరికన్లు ఎంతగానో ఎదురుచూసిన ఈ వేడుకను టీవీ ఛానళ్లతో పాటు ట్విట్టర్, ఫేస్బుక్, యూట్యూబ్ తదితర సామాజిక మాధ్యమాలు కూడా ప్రత్యక్ష ప్రసారం చేశాయి.
అతిథుల సమక్షంలో...
ఈ వేడుకకు మాజీ అధ్యక్షుడు బిల్ క్లింటన్, ఆయన సతీమణి హిల్లరి క్లింటన్, మాజీ అధ్యక్షుడు బరాక్ ఒబామా, ఆయన సతీమణి మిషెల్ ఒబామా హాజరయ్యారు.
అమెరికా ప్రతినిధుల సభ స్పీకర్ నాన్సీ పెలోసీతో పాటు పలువురు చట్టసభ్యులు కూడా ఈ వేడుకలో పాల్గొన్నారు.
మాజీ అధ్యక్షుడు ట్రంప్ ప్రభుత్వంలో ఉపాధ్యక్షుడుగా సేవలందించిన మైక్ పెన్స్ కూడా బైడెన్ ప్రమాణస్వీకార మహోత్సవానికి హాజరయ్యారు.
అంతకుముందు..
క్యాపిటల్కు వచ్చే ముందు.. కుంటుంబసభ్యులు సమేతంగా వాషింగ్టన్లోని చారిత్రక చర్చిని సందర్శించారు బైడెన్-కమల. చర్చిలో ప్రత్యేక ప్రార్థనలు నిర్వహించారు.
ఇదీ చూడండి:- బైడెన్ బృందంలో కీలకంగా భారతీయులు!
