సిరియాలో వైమానిక దాడి జరిపిన నేపథ్యంలో అమెరికా అధ్యక్షుడు జో బైడెన్ ఇరాన్ను హెచ్చరించారు. మిలీషియా బృందాలకు సహకరిస్తూ అమెరికాకు హాని తలపెట్టాలని చూస్తే తీవ్ర పరిణామాలు ఎదుర్కోక తప్పదని స్పష్టం చేశారు. సిరియాపై దాడి అనంతరం ఈ విధంగా స్పందించారు.
ఇరాక్ - సిరియా సరిహద్దులో గురువారం జరిపిన వైమానిక దాడిపై రక్షణ విభాగం పెంటాగాన్ ప్రతినిధి జాన్ కిర్బై వివరాలు వెల్లడించారు. ఏడు క్షిపణులతో దాడులు జరిపామని, ఈ క్రమంలో ఇరాన్ మిటిటెంట్ బృందాలకు చెందిన 9 స్థావరాలు ధ్వంసమయ్యాయని తెలిపారు. దాడి గురించి చట్టసభ్యులకు ముందుగానే సమాచారం ఇచ్చామన్నారు. అయితే దాడికి సంబంధించిన పూర్తి వివరాలను వెల్లడించలేదు.
ఈనెల 15న ఉత్తర ఇరాక్ లో మిలీషియా బృందం జరిపిన రాకేట్ దాడిలో ఓ అమెరికా అధికారి గాయపడ్డారు. ఇందుకు ప్రతిచర్యగా అమెరికా వైమానిక దాడి జరిపింది. మిలిటెంట్ బృందాలకు ఇరాన్ సాయం అందిస్తోందని అమెరికా భావిస్తోంది.
22 మంది మృతి..
దాడిలో ఒక మిలిటెంట్ సహా పలువురు గాయపడ్డారని మిలిటెంట్ వర్గాలు తెలిపాయి. హిజ్బుల్లా బ్రిగ్రేడ్స్ అనే మిలీషియా బృందమే లక్ష్యంగా ఈ దాడులు జరిగాయని పేర్కొన్నాయి. అయితే ఈ దాడిలో 22 మంది మిలిటెంట్లు చనిపోయారని బ్రిటన్కు చెందిన సిరియన్ మానవ హక్కుల విభాగం వెల్లడించింది.
బైడెన్ అమెరికాను కాపాడారు..
వైమానిక దాడుల ద్వారా అధ్యక్షుడు బైడెన్ ఇరాక్లోని అమెరికన్లను రక్షించారని శ్వేతసౌధం పేర్కొంది. ఈ చర్య ద్వారా అమెరికన్ల రక్షణ కోసం కట్టుబడి ఉన్నాననే సందేశాన్ని అధ్యక్షుడు తెలియజేస్తున్నారని వ్యాఖ్యానించింది. ఇరాన్తో దౌత్యపరమైన చర్చలకు తాము సిద్ధంగానే ఉన్నామని స్పష్టం చేసింది.
వ్యతిరేకత..
వైమానిక దాడులపై అమెరికా చట్టసభలో మిశ్రమ స్పందన లభించింది. రిపబ్లికన్లు దీనిని సమర్థించగా, బైడెన్ సొంత పార్టీకి చెందిన పలువురు ఈ చర్యను తప్పుపట్టడం గమనార్హం. చట్టసభ ఆమోదం లేకుండా ఇలా దాడులు జరపడం రాజ్యాంగ విరుద్ధం అని పేర్కొన్నారు.
ఇదీ చదవండి : భారత్-పాక్ ప్రకటనపై ఐరాస హర్షం
