సెకండ్​ వైల్డ్​ కార్డ్​ ఎంట్రీ ఫొటో రిలీజ్​​ - ఎవరో గుర్తుపట్టగలరా? - BB 8 Second Wild Card Contestant

Bigg Boss 8 Telugu : బిగ్​బాస్ సీజన్ 8 ఇప్పుడు రసవత్తరంగా సాగుతోంది. ఓ వైపు వైల్డ్​ కార్డ్​ ఎంట్రీస్.. మరోవైపు ఐదో వారంలో మిడ్​ వీక్​ ఎలిమినేషన్​​ గురించి ప్రేక్షకులు ఎంతగానో ఎదురుచూస్తున్నారు. ఇప్పటికే ఫస్ట్​ వైల్డ్​ కార్డ్​ కంటెస్టెంట్​ ఫొటో రిలీజ్​ చేసిన బిగ్​బాస్​ నిర్వాహకులు.. తాజాగా రెండో కంటెస్టెంట్​ ఫొటో రిలీజ్​​ చేశారు. మరి.. ఆ వ్యక్తి ఎవరో మీరు గుర్తుపట్టగలరా?

Bigg Boss 8 Telugu Second Wild Card Contestant: బుల్లితెర ప్రేక్షకులను అలరిస్తోన్న బిగ్​బాస్ సీజన్​ 8 రసవత్తరంగా సాగుతోంది. సెప్టెంబర్​ 1న మొత్తం 14 మంది కంటెస్టెంట్స్ హౌజ్​లో అడుగు పెడితే నలుగురు బయటకు వెళ్లిపోయారు. బెజవాడ బేబక్క, శేఖర్ బాషా, అభయ్ నవీన్, సోనియా ఆకుల ఎలిమినేట్ అయ్యారు. దీంతో ప్రస్తుతం హౌజ్​లో 10 మంది కంటెస్టెంట్స్ మాత్రమే మిగిలారు. దీనికి తోడు ఈ వారం డబుల్​ ఎలిమినేషన్​ ఉంటుందని.. హోస్ట్ నాగార్జున బాంబు పేల్చారు. ఇదిలా ఉంటే గత కొన్నిరోజుల నుంచి వైల్డ్ కార్డ్ ఎంట్రీల గురించి సోషల్ మీడియాలో తెగ రూమర్లు వినిపిస్తున్నాయి. సీజన్​ 1 నుంచి సీజన్​ 7 వరకు పార్టిసిపేట్​ చేసిన మాజీ కంటెస్టెంట్లు వైల్డ్ కార్డ్​ ద్వారా మళ్లీ బిగ్ బాస్ హౌజ్​లోకి వస్తున్నారని ప్రచారం జరుగుతోంది. ఇప్పటికే ఫస్ట్​ వైల్డ్​ కార్డ్​ కంటెస్టెంట్​ ఫొటో రిలీజ్​ చేసిన బిగ్​బాస్​ నిర్వాహకులు.. తాజాగా రెండో కంటెస్టెంట్​ ఫొటో రిలీజ్​​ చేసి గెస్​ చేయమంటున్నారు. మరి.. ఆ వ్యక్తి ఎవరో మీరు గుర్తుపట్టగలరా?

బిగ్​బాస్​ నిర్వాహకులు రిలీజ్​ చేసిన ఫస్ట్​ వైల్డ్​ కార్డ్​ ఫొటోను చూసిన నెటిజన్లు సీజన్​ 7లో పార్టిసిపేట్​ చేసిన టేస్టీ తేజనే అంటూ కామెంట్లు పెడుతున్నారు. ఇక ఇప్పుడు రెండో వైల్డ్​ కార్డ్​ ఫొటోను చూసిన బిగ్ బాస్ అభిమానులు, నెటిజన్లూ తమకు తోచిన పేర్లు చెబుతున్నారు. ఈ ఫొటోను చూస్తుంటే బిగ్​బాస్ సీజన్ 3లో సందడి చేసిన రోహిణి అంటూ చాలా మంది కామెంట్స్ చేస్తున్నారు.

రోహిణి: లేడీ కమెడియన్​గా ఫేమ్ రాబట్టింది రోహిణి. గతంలో పలు సీరియల్స్​లో కూడా నటించింది. ప్రస్తుతం పలు కామెడీషోలతో పాటు వెండితెరపై సత్తా చాటుతోంది. ఇక ఈమెకు క్రేజ్, ఫాలోయింగ్ ఎక్కువగానే ఉంది. బిగ్​బాస్ తెలుగు సీజన్ 3లో పాల్గొన్న రోహిణి.. తన మార్క్ గేమ్​తో ప్రేక్షకులను ఆకట్టుకునే ప్రయత్నం చేసింది. ఈ క్రమంలోనే నాలుగో వారంలో డైరెక్ట్​గా నామినేట్​ అయి.. అదే వారంలో ఇంటి నుంచి బయటికి వచ్చింది. మరి ఈసారి ఎన్ని వారాల పాటు బిగ్ బాస్​లో ఉంటుందో తెలియాల్సి ఉంది. అయితే ప్రస్తుత సీజన్​లో కామెడీ చేయగల లేడీ కంటెస్టెంట్ లేకపోవడంతో రోహిణి ఆ స్థానాన్ని ఫిల్ చేస్తుందని అంచనా వేస్తున్నారు.

వైల్డ్​ కార్డ్​ ఎంట్రీ డేట్ అప్పుడే: ఈ సీజన్​లో "బిగ్​బాస్​ రీలోడ్​ ఈవెంట్"​ పేరుతో వైల్డ్​ కార్డ్​ ఎంట్రీలను హౌజ్​లోకి పంపించనున్నారు. ఇటీవలె రిలీజ్​ అయిన ప్రోమోను బట్టి చూస్తుంటే వైల్డ్ కార్డ్ ఎంట్రీలు ఈ రానున్న ఆదివారం(అక్టోబర్​ 6) రోజున హౌజ్​లోకి అడుగు పెట్టే ఛాన్స్ ఉందనే విషయం స్పష్టంగా అర్థం అవుతోంది. అంటే ఈ ఈవెంట్​ నవరాత్రుల స్పెషల్​గా అక్టోబర్​ 6వ తేదీన రాత్రి 7 గంటలకు ప్రసారం కానుంది.