డెమోక్రాటిక్ పార్టీ తరఫున అమెరికా అధ్యక్ష పదవికి అధికారికంగా అభ్యర్థిత్వాన్ని సాధించారు జో బిడెన్. కరోనా వ్యాప్తి, ఆర్థిక సంక్షోభం, అశాంతి వంటి కీలక అంశాలే ప్రధాన అజెండాగా నవంబరులో జరిగే ఎన్నికల్లో ప్రస్తుత అధ్యక్షుడు డొనాల్ట్ ట్రంప్ను ఢీ కొట్టనున్నారు. అత్యంత ప్రతిభావంతులైన డెమోక్రాటిక్ అభ్యుర్థులతో పోటీ పడి ఈ అర్హత సాధించినందుకు సంతోషంగా ఉన్నట్లు చెప్పారు బిడెన్. పార్టీ ఐకమత్యంతో ఈ ఎన్నికల్లో ముందుకుసాగుతున్నందుకు గర్వంగా ఉందన్నారు.
అధ్యక్ష పదవి నామినేషన్కు 1991 మంది ప్రతినిధుల మద్దతు అవసరం కాగా, ఏడు రాష్ట్రాలు ఒక జిల్లాలో ప్రాథమిక ఎన్నికలు ముగిసేసరికి 1995 మంది మద్దతు కైవసం చేసుకున్నారు బిడెన్. ఈ ఎన్నికలు.. ఫలితాలు మెయిల్ ఓట్లు ఎక్కువ ఉన్న కారణంగా శుక్రవారం రాత్రి పూర్తిగా వెలువడ్డాయి. ఇంకా ఎనిమిది రాష్ట్రాల్లో ఎన్నికలు జరగాల్సి ఉంది. డెమోక్రాట్ల మరో అభ్యర్థి బెర్నీ సాండర్స్ ఎప్రిల్లోనే రేసు నుంచి వైదొలిగారు.
'ప్రస్తుతం అమెరికా చరిత్రలో ఎన్నడూ లేని స్థాయిలో నిరుద్యోగ రేటు పెరిగింది. డొనాల్డ్ ట్రంప్ ఆగ్రహం, విభజన రాజకీయాలు సమస్యకు పరిష్కారం కాదు. ప్రస్తుతం దేశం ఓ నాయకుడి కోసం ఎదురు చూస్తోంది' అని బిడెన్ అన్నారు.
ఒబామా హయాంలో అమెరికా ఉపాధ్యక్షునిగా ఉన్నారు 77 ఏళ్ల బిడెన్. 36 ఏళ్ల పాటు సెనేట్లో ఉన్నారు. నల్లజాతీయుల నుంచి ఆయనకు భారీగా మద్దుతు ఉంది.
ఇటీవల ఫాక్స్ న్యూస్ నిర్వహించిన ఓ సర్వేలో 14 శాతం మంది నల్లజాతీయులు మాత్రమే ట్రంప్ వైపు మొగ్గు చూపగా, 75 శాతం మంది బిడెన్కే అనుకూలంగా ఉన్నారు. ప్రస్తుతం అమెరికావ్యాప్తంగా జార్జి ఫ్లాయిడ్ మృతికి వ్యతిరేకంగా నిరసనలు జరుగుతున్నాయి. వారికి సరైన ప్రాధాన్యం ఇస్తే బిడెన్కు కలిసివచ్చే అవకాశాలు ఎక్కువే. ఉపాధ్యక్ష పదవికి మహిళనే ఎంచుకుంటానని ఇప్పటికే ప్రకటించారు బిడెన్. ఆ అవకాశం నల్లజాతీయులకు ఇవ్వాలని ఆయనపై ఇప్పుడు ఒత్తిడి పెరుగుతోంది.
