భారత్-పాకిస్థాన్ల మధ్య ఉద్రిక్తతలు పెరగకుండా ఉండేందుకు చర్చల ద్వారా పరిష్కారం కనుగొనేందుకు కృషి చేయాలని ఐక్యరాజ్య సమితి ప్రధాన కార్యదర్శి ఆంటోనియో గుటెరస్ సూచించారు. ఈ దేశాల నడుమ ఏదైనా సైనిక ఘర్షణ తలెత్తితే ఆ రెండు దేశాలతో పాటు ప్రపంచాన్ని ప్రమాదంలో పడేస్తుందని ఆందోళన వ్యక్తం చేశారు. కశ్మీర్ అంశంలో భారత్-పాక్ల సంబంధాలపై దాయాది జర్నలిస్టు అడిగిన ప్రశ్నకు ఈ మేరకు సమాధానమిచ్చారు గుటెరస్.
కశ్మీర్పై ఇరు దేశాల మధ్య ప్రస్తుత పరిస్థితులు సవ్యంగా ఉన్నట్టు కనిపించట్లేదన్న గుటెరస్.. సైన్యంతో పరిష్కారం ఎంతమాత్రం సముచితం కాదని అభిప్రాయపడ్డారు. భారత్-పాక్లు అంగీకరిస్తే శాంతియుత పరిష్కారం కనుగొనేందుకు తమకు అభ్యంతరం లేదన్నారు. భారత్-పాక్ల మధ్య ఉన్న సమస్యలపై కచ్చితంగా చర్చ జరగాల్సిన అవసరం ఉందని తెలిపారు.
"చర్చల ప్రక్రియను వేగవంతం చేయాల్సిన అవసరం ఉంది. అది అత్యంత అవసరమని నమ్ముతున్నాం. అయితే ఆ చర్చలు భారత్-పాక్ సరిహద్దుల్లో.. నియంత్రణ రేఖపై చేపట్టాల్సి ఉందని చెప్పగలను. ఈ ప్రాంతంలో మానవ హక్కులకు గౌరవమివ్వాలి."
- ఆంటోనియో గుటెరస్, ఐరాస ప్రధాన కార్యదర్శి
2019లో కేంద్రం జమ్ముకశ్మీర్ స్వయంప్రతిపత్తి, ఆర్టికల్ 370 రద్దు చేసిన తర్వాత భారత్-పాక్ల మధ్య ఉద్రిక్తతలు మరింత పెరిగాయి. భారత్తో దౌత్య సంబంధాలను మరింత తగ్గించిన పాక్.. పాక్లో భారత హైకమిషనర్ని వెనక్కి పంపింది. మరోవైపు ఈ విషయం పూర్తిగా అంతర్గత వ్యవహారమని భారత్ తేల్చిచెప్పింది.
జమ్ముకశ్మీర్ పరిస్థితులపై 2019 ఆగస్టులో గుటెరస్ ప్రకటనపై పాక్ జర్నలిస్ట్ ప్రస్తావించగా.. ఆ వ్యాఖ్యలకు కట్టుబడి ఉన్నట్లు చెప్పారు. "పాకిస్థాన్ పర్యటన సందర్భంగా కశ్మీర్లో పరిస్థితులపై ఆందోళన వ్యక్తం చేస్తూ.. భారత్, పాక్ల మధ్య దీర్ఘకాలంగా ఉన్న సమస్యను పరిష్కరించేందుకు మధ్యవర్తిత్వం వహించేందుకు సిద్ధంగా ఉన్నట్లు ప్రకటించారు". ఈ ప్రతిపాదనను తిరస్కరించిన భారత్.. పాకిస్థాన్ అక్రమంగా ఆక్రమించుకున్న భూభాగం విడుదలపై దృష్టి సారించాలని సూచించింది.
ఇదీ చదవండి: కరోనా టీకా తొలి డోసు తీసుకున్న ఐరాస చీఫ్
