డొమినికాలో పట్టుబడ్డ మెహుల్ చోక్సీని నేరుగా భారత్కు తిరిగి అప్పగించడానికే ఆంటిగ్వా ప్రాధాన్యం ఇస్తున్నట్లు అక్కడి ప్రభుత్వం వెల్లడించింది. బుధవారం జరిగిన కేబినెట్ సమావేశంలో ఈ విషయంపై ప్రభుత్వం స్పష్టతకు వచ్చినట్లు స్థానిక మీడియా వెల్లడించింది. ప్రధాని గాస్టన్ బ్రౌనీ ఆధ్వర్యంలో జరిగిన ఈ సమావేశంలో ఆంటిగ్వా నుంచి చోక్సీ డొమినికాకు పరారుకావడంపై చర్చించారని పేర్కొంది.
చోక్సీ పౌరసత్వం రద్దు, భారత్కు అప్పగింతపై పెండింగ్లో ఉన్న కేసుల విచారణను వేగవంతం చేస్తామని ఆంటిగ్వా సమాచార శాఖ మంత్రి మెల్ఫర్డ్ నికోలెస్ తెలిపారు. అయితే చోక్సీ పరారీలో ఓ మహిళ హస్తం ఉందన్న ఆరోపణలపై వివరాలు వెల్లడించడానికి మంత్రి నిరాకరించారు.
'చోక్సీని తప్పకుండా తీసుకువస్తాం'
మెహుల్ చోక్సీని డొమినికా నుంచి భారత్కు తిరిగి రప్పించేందుకు శాయశక్తులా ప్రయత్నిస్తున్నామని విదేశాంగ శాఖ పేర్కొంది.
డొమినికాలోకి అక్రమంగా ప్రవేశించారన్న ఆరోపణలపై ప్రస్తుతం చోక్సీని ఆ దేశ హైకోర్టు విచారిస్తోంది. చోక్సీ దాఖలు చేసిన బెయిల్ పిటిషన్ను కూడా కోర్టు తిరస్కరించింది. పీఎన్బీ కుంభకోణంలో నిందితులుగా ఉన్నారు చోక్సీ.
విమానం బయలుదేరింది..
చోక్సీని తిరిగి రప్పించేందుకు డొమినికాకు చేరిన భారత బృందం తిరుగు ప్రయాణమైంది. ఖతర్ ఎయిర్వేస్కు చెందిన ప్రైవేట్ విమానంలో బృందం భారత్ చేరనుంది. ఏ7సీఈఈ పేరుతో ఉన్న ఈ విమానంలో మే 28న భారత్ బృందం డొమినికాకు ప్రయాణమయింది.
ఇదీ చదవండి : Mehul Choksi: దిల్లీలో దిగగానే చోక్సీ అరెస్ట్?
