ఇప్పడు ప్రపంచమంతా అరచేతిలోనే ఉంది. అంతర్జాలంతో ఏ సమాచారమైనా చిటికెలో పొందుతున్నాం. స్మార్ట్ఫోన్ వినియోగదారుల సంఖ్య రోజురోజుకు పెరుగుతోంది. కానీ ఈ కాలంలోనూ ప్రాథమిక ఇంటర్నెట్ సేవలు లేని వారు ఎందరో ఉన్నారు. వారికోసం ఆన్లైన్ మార్కెటింగ్ దిగ్గజ సంస్థ ఆమెజాన్ 'ప్రాజెక్ట్ క్యూపర్'ను అందుబాటులోకి తెచ్చింది.
"భూ కక్ష్యలో ఉపగ్రహాల సమూహాన్ని ఏర్పాటు చేయడమే ఈ ప్రాజెక్ట్ క్యూపర్. దీనితో ప్రపంచవ్యాప్తంగా ప్రాథమిక సదుపాయం లేనివారు అధికంగా లబ్ధి పొందుతారు. సేవలు తక్కువున్న ప్రాంతాలూ లాభపడతాయి."
--- ఆమెజాన్
ఈ ప్రాజెక్ట్ కోసం ఎన్నో బిలియన్ డాలర్లను వెచ్చించడానికి ఆమెజాన్ సిద్ధపడింది. ఇది కార్యరూపం దాల్చితే కొన్ని కోట్ల మంది లబ్ధి పొందుతారు. ఈ విషయాలను అమెరికాకు చెందిన 'గీక్వైర్' వెబ్సైట్ స్పష్టం చేసింది.
భూమికి 590-620 కిలోమీటర్ల ఎత్తులో 3వేల 236 ఉపగ్రహాలను ఏర్పాటు చేయాలని ప్రణాళిక రచించింది ఆమెజాన్.
సుదూర ప్రాంతాల్లో ఇంటర్నెట్ సదుపాయాలు అందించడానికి ఉపగ్రహాలను ఉపయోగించాలని కోరుతున్న అనేక కంపెనీలలో ఆమెజాన్ ఒకటి. ఈ జాబితాలో స్పేస్ ఎక్స్, వన్వెబ్ ఉన్నాయి.
ఇదీ చూడండి: కోడిపిల్ల బుజ్జిగాడికి... బుల్లి బహుమతి
