Texas woman: తల్లితో కలిసి సూపర్ మార్కెట్కు వచ్చిన పసిపిల్లవాడిని 'కొందాం' అనుకున్న మహిళ కటకటాలపాలైంది. దాదాపు పదేళ్లు శిక్ష పడే అవకాశమున్న కేసులో విచారణ ఎదుర్కొంటోంది. అమెరికా టెక్సాస్ రాష్ట్రం క్రొకెట్లో జరిగిందీ ఘటన.
ముద్దుగా ఉన్నాడంటూ..
Texas Woman Arrested Walmart: ఓ మహిళ.. నెలల వయసున్న కుమారుడితో కలిసి గతవారం వాల్మార్ట్కు వచ్చింది. సెల్ఫ్ చెక్ఔట్ లైన్లో వేచి చూస్తుండగా.. నిందితురాలు రెబెకా లానెట్ టేలర్(49) మరో మహిళతో కలిసి వచ్చింది. ఆ పిల్లాడి జుట్టు, నీలి రంగు కళ్లు ఎంతో బాగున్నాయంటూ మాట కలిపింది. అతడ్ని ఎంతకు అమ్ముతావంటూ తల్లిని ప్రశ్నించింది. రెబెకా జోక్ చేస్తోందని అనుకుని.. ఆ మహిళ ఊరుకుంది.
కానీ రెబెకా టేలర్ మాత్రం అక్కడితో ఆగలేదు. "నా కారులో రెండున్నర లక్షల డాలర్లు ఉన్నాయి. పిల్లాడ్ని ఇస్తే ఆ డబ్బంతా నీకు ఇచ్చేస్తా" అని ఆఫర్ ఇచ్చింది. ఇంతలోనే టేలర్తో పాటు వచ్చిన మహిళ.. పిల్లాడి పేరు ఏంటని అడిగింది. తల్లి సమాధానం ఇవ్వలేదు. అసలు ఏం జరుగుతుందా అని ఆలోచించేలోపే.. టేలర్, ఆమెతో ఉన్న వ్యక్తి.. ఆ పిల్లాడ్ని పేరు పెట్టి పిలవడం మొదలుపెట్టారు. అతడ్ని కొనాలని ఎప్పటినుంచో అనుకుంటున్నట్లు చెప్పారు. ఈ మాటలతో ఆ తల్లి ఒక్కసారిగా భయపడిపోయింది. అక్కడి నుంచి హుటాహుటిన వెళ్లిపోయింది.
ధర పెంచి.. బెదిరించి..
తల్లి, పిల్లవాడు పార్కింగ్ లాట్లో ఉండగా.. రెబెకా టేలర్ మరోమారు వారి దగ్గరకు వెళ్లింది. ఈసారి స్వరం పెంచింది. తల్లిపై అరవడం మొదలుపెట్టింది. "రెండున్నర లక్షల డాలర్లు చాలకపోతే 5లక్షల డాలర్లు(సుమారు రూ.3కోట్ల 74 లక్షలు) ఇస్తా. నాకు ఆ పిల్లవాడు కావాల్సిందే. నేను అతడ్ని తీసుకెళ్తా" అని గట్టిగా చెప్పింది.
టేలర్ మాటలతో వణికిపోయిన తల్లి.. పిల్లవాడితో కలిసి తన కారులో లాక్ చేసుకుని కూర్చొంది. కాసేపటికి టేలర్ అక్కడి నుంచి వెళ్లిపోయింది. బాధితురాలు పోలీసులకు ఫిర్యాదు చేసింది. సీసీటీవీ కెమెరాల్లో నమోదైన దృశ్యాలన్నీ చూసిన పోలీసులు.. టేలర్ను అరెస్టు చేశారు. హ్యూస్టన్ కౌంటీ జైలుకు తరలించారు.
ఈ కేసులో టేలర్ దోషిగా తేలితే.. ఆమెకు పదేళ్ల వరకు జైలు శిక్ష, 10 వేల డాలర్ల వరకు జరిమానా పడే అవకాశముంది.
సంబంధం కోసం వెతుకుతున్నారా? తెలుగు మాట్రిమోనిలో రిజిస్ట్రేషన్ ఉచితం!
ఇవీ చూడండి: రూ.లక్షన్నరతో రెండేళ్ల పిల్లాడి షాపింగ్- అమ్మ ఫోన్తో ఆడుకుంటూ...
