ఐస్క్రీం పేరువినగానే చాక్లెట్, వెనీలా ఇలా ఇంకా చాలా పేర్లు గుర్తొస్తాయి. దక్షిణాఫ్రికాలోని కేప్ టౌన్లో మాత్రం ఓ కొత్త రకం ఐస్క్రీం తయారు చేస్తున్నారు కొందరు ఔత్సాహికులు.
ఇందులో ప్రత్యేకతేముంది అనుకుంటున్నారా..? ఇప్పటి వరకు ఉన్న ఐస్క్రీంలు అన్నీ పాలతో తయారు చేసినవైతే.. ఈ ఐస్క్రీం మాత్రం చిన్నచిన్న కీటకాలతో తయారు చేసింది. వినడానికి కాస్త ఇబ్బందిగా ఉన్నా ఇది నిజం.
కీటకాల లార్వాతో చేసిన ఈ ఐస్క్రీం వల్ల హాని ఉండదంటున్నారు అక్కడి నిపుణులు. 'కేప్ టౌన్ యూనివర్సిటీ ఆఫ్ టెక్నాలజీ' కేంద్రంగా పని చేస్తోన్న 'గౌర్మెట్ గ్రాబ్' సంస్థ ఈగల లార్వాను మూల పదార్థంగా చేసుకుని ఈ ఐస్క్రీంను తయారు చేస్తోంది.
ఐస్క్రీం యంత్రంలో లార్వా మిశ్రమాన్ని వేసే ముందు కోకో, తేనె సహా ఇతర సహజ పదార్థాలను ఇందులో కలుపుతున్నట్లు వెల్లడించింది.
ఈగ లార్వాలో చాలా పోషకాలు ఉంటాయని... అయితే ఇది అందరికి నచ్చుతుందని చెప్పలేమంటున్నారు యూనివర్సిటీ ఆఫ్ కేప్ టౌన్ ప్రొఫెసర్, డాక్టర్ మైక్ పికెర్.
ప్రస్తుతం ఈ ఐస్ క్రీంను 'ఓల్డ్ బిస్కట్ మిల్క్' మార్కెట్లో వారానికోసారి విక్రయిస్తున్నారు. త్వరలోనే రిటైల్ స్టోర్ను తెరిచి నిత్యం అమ్మకాలు జరుపుతామంటున్నారు నిర్వాహకులు. ఆ తర్వాత జొహెన్స్బర్గ్లో మరో స్టోర్ సహా వీలైనంత త్వరగా ఐరోపా, అమెరికాల్లో కూడా రిటైల్ స్టోర్లను తెరవనున్నట్లు తెలిపారు.
ఇదీ చదవండి: యూఏఈ లాటరీలో 28కోట్లు గెలిచిన భారతీయుడు
