ప్రతిష్టాత్మక నోబెల్ శాంతి పురస్కారం 2019కి గాను ఇథియోపియా ప్రధాని అబీ అహ్మద్ అలీని వరించింది. అంతర్జాతీయ సహకారం, శాంతి స్థాపనకు ఆయన చేసిన కృషికి గుర్తింపుగా ఈ పురస్కారాన్ని అందిచనున్నామని నోబెల్ కమిటీ ఛైర్పర్సన్ బెరిట్ రీస్-అండర్సన్ వెల్లడించారు. నార్వే రాజధాని ఓస్లో వేదికగా ఈ ప్రకటన విడుదల చేశారు.
పొరుగు దేశం ఎరిట్రియాతో సరిహద్దు విషయమై నెలకొన్న ఉద్రిక్తతలను తగ్గించేందుకు చేసిన కృషికి గుర్తింపుగా అబీ అహ్మద్కు ఈ అరుదైన గౌరవం దక్కింది.
1998-2000 మధ్య ఎరిట్రియాతో యుద్ధం తర్వాత దాదాపు 20 ఏళ్లపాటు రెండు దేశాల మధ్య కొనసాగిన సైనిక ఉద్రిక్తతలకు గతేడాది ముగింపు పలికారు అహ్మద్. గతేడాది ఎరిట్రియాతో శాంతి ఒప్పందాన్ని కుదుర్చుకుంది ఇథియోపియా.
డిసెంబరులో జరిగే కార్యక్రమంలో ఈ పురస్కారాన్ని అందుకోనున్నారు అబీ అహ్మద్. పురస్కారం కింద అహ్మద్కు దాదాపు 6.48 కోట్ల రూపాయల నగదు బహుమానం లభిస్తుంది.
'అందుకే ఛాంపియన్'
అహ్మద్కు శాంతి పురస్కారం ప్రకటించడం పట్ల ఇథియోపియా ప్రధానమంత్రి కార్యాలయం హర్షం వ్యక్తం చేసింది. నోబెల్ శాంతి పురస్కారం రావడం పట్ల ఒక దేశంగా గర్విస్తున్నామని ప్రకటన విడుదల చేసింది. 2018 ఏప్రిల్లో బాధ్యతలు చేపట్టిన నాటి నుంచి శాంతి, క్షమాగుణం, సహకారం, ఇరుపక్షాల మధ్య అవగాహన దిశగా ప్రధాని చేపట్టిన పనులే ఛాంపియన్గా నిలబెట్టాయని ఉద్ఘాటించింది ప్రధాని కార్యాలయం.
వందో శాంతి పురస్కారం
ఈసారి శాంతి పురస్కారానికి 223 మంది వ్యక్తులతోపాటు 78 సంస్థలు నామినేట్ అయ్యాయి. తాజా నోబెల్... వందో శాంతి పురస్కారం కావడం ప్రాధాన్యం సంతరించుకుంది.
ఇదీ చూడండి: చిన్నారి ప్రాణం కాపాడిన గాలి బుడగలు
