Jabardast Nookaraju: మధ్య తరగతి కుటుంబం.. ఓ చిన్న ఉద్యోగం.. కానీ నటన, కామెడీషోస్పై ఉన్న ఆసక్తి అతడిని ఇండస్ట్రీ వైపు నడిపింది. కానీ ఎన్నో ఆడిషన్స్కు వెళ్లినా అవకాశాలు రాలేదు. మాటలు కూడా పడ్డాడు! నిరుత్సాహం వెంట పడినా.. కళనే నమ్ముకున్నాడు. చివరకు ఓ కామెడీ షో ద్వారా తనకు వచ్చిన అవకాశాన్ని అందిపుచ్చుకుని కెరీర్లో ముందుకు సాగాడు. కట్ చేస్తే ఓ పాత్ర తన లైఫ్ను మలుపు తిప్పింది. మంచి పేరు తెచ్చి పెట్టింది. అతడే 'జబర్దస్త్' నూకరాజు. తాజాగా ఈటీవీ భారత్తో ముచ్చటించిన అతడు ఇండస్ట్రీకి ఎలా వచ్చాడు? ఎలాంటి కష్టాలు ఎదుర్కొన్నాడు? తన లక్ష్యం ఏమిటి? వంటి విషయాలను తెలిపాడు.
"నేను విజయవాడలో పుట్టాను. 'జబర్దస్త్'లో ఉండటం చాలా సంతోషంగా ఉంది. ఇంటి దగ్గర కూడా సరదాగా నవ్వించేవాడిని. అందరూ బాగా నవ్విస్తున్నాను అనేవారు. అలా సినీ ఇండస్ట్రీలోకి వెళ్లాలనిపించింది. చాలా ఆడిషన్స్ ట్రై చేశాను. అవకాశాలు రాలేదు. ఏదేదో అనేవారు. ఆ తర్వాత 'జీ' తెలుగులో 'కామెడీ ఖిలాడి', 'పటాస్', 'పిట్టగోడ'.. అనంతరం 'జబర్దస్త్', 'శ్రీదేవి డ్రామా కంపెనీ'లో చేశాను. చంటి స్కిట్లలో నటించాను.
మొదట చిన్న చిన్న పాత్రలు చేశాను. అలా ఓ రోజు హిజ్రా రోల్ చేశాను. దాంతో మంచి పేరు వచ్చింది. అప్పుడు నన్ను గుర్తించారు. కాస్త పెద్ద పాత్రలు ఇవ్వడం ప్రారంభించారు. జీహెచ్ఎంసీ సహా పలు స్పెషల్ స్కిట్లు చేశా. వాటి వల్ల మరింత గుర్తింపు వచ్చింది. ఇది నాకు గొప్ప అనుభూతినిచ్చింది. ప్రసన్న, శ్రీను, చంటి ఇలా ముగ్గురు, నలుగురు నన్ను బాగా ప్రోత్సాహించారు. చంటి చేసే స్కిట్లకు, 'శ్రీదేవి డ్రామా కంపెనీ'లోని కొన్ని ఈవెంట్లకు స్క్రిప్ట్లు నేనే రాస్తున్నాను. సినిమాలు చేసినా టీవీని మాత్రం ఎప్పటికీ వదలను. విలన్, ఎమోషన్, అమాయకం ఇలా అన్నీ పాత్రలు చేయాలి. ఓ క్యారెక్టర్ ఆర్టిస్ట్ అవ్వాలనేదే నా కోరిక" అని నూకరాజు పేర్కొన్నాడు.
ఇదీ చూడండి: గవర్నమెంట్ జాబ్ వదిలేసి వచ్చా... లేడీ గెటప్స్తో మహా టార్చర్!
