విజయ్ దేవరకొండ హీరోగా పూరి జగన్నాథ్ దర్శకత్వంలో 'లైగర్' సినిమా రూపొందుతోంది. అనన్య పాండే కథానాయికగా అలరించనున్న ఈ సినిమాను ఆగస్టు 25వ తేదీన విడుదల చేయనున్నారు. ఈ సినిమా తరువాత ప్రాజెక్టుగా 'ఖుషి'ని విజయ్ దేవరకొండ పట్టాలెక్కించాడు. శివ నిర్వాణ ఈ సినిమాకి దర్శకత్వం వహిస్తున్నాడు. సమంత కథానాయికగా నటిస్తున్న ఈ సినిమా ఇటీవలే కశ్మీర్ లో ఫస్టు షెడ్యూల్ ను పూర్తి చేసుకుంది. ఆ తరువాత షెడ్యూల్ ను హైదరాబాదులో ప్లాన్ చేశారు. ఈ సినిమా తరువాత మళ్లీ ఆయన పూరి దర్శకత్వంలోనే 'జనగణమన' చేయనున్నాడు. అందుకు సంబంధించిన సన్నాహాలు కూడా జరుగుతూనే ఉన్నాయి.
ఆ తరువాత విజయ్ దేవరకొండ సినిమా మోహనకృష్ణ ఇంద్రగంటితో ఉండనున్నట్టుగా తెలుస్తోంది. ఇటీవల ఆయన కథ చెప్పడం .. విజయ్ దేవరకొండ గ్రీన్ సిగ్నల్ ఇవ్వడం జరిగిపోయాయని అంటున్నారు. ఇక ఇంద్రగంటి తాజా చిత్రంగా రూపొందిన 'ఆ అమ్మాయి గురించి మీకు చెప్పాలి' త్వరలో ప్రేక్షకుల ముందుకు రానున్న సంగతి తెలిసిందే.
మలేసియాకు చిరు..
మెగాస్టార్ చిరంజీవి మలేసియా వెళ్లడానికి రెడీ అవుతున్నట్లు సమాచారం. కేఎస్‌ రవీంద్ర (బాబీ) దర్శకత్వంలో 'వాల్తేరు వీరయ్య' అనే సినిమా రూపొందుతున్న సంగతి తెలిసిందే. ఇప్పటికే ఈ చిత్రం షూటింగ్ దాదాపు 30 శాతం పూర్తయింది. ఈ సినిమా నెక్ట్స్‌ షెడ్యూల్ మలేసియాలో ప్రారంభం కానుందని సమాచారం. జూన్‌ మొదటివారంలో లేదా రెండోవారం ప్రారంభంలో చిరంజీవి, బాబీ అండ్‌ కో మలేసియాకు పయనం అయ్యే అవకాశం ఉంది. ఈ చిత్రంలో శ్రుతీహాసన్‌ హీరోయిన్‌. నవీన్‌ ఎర్నేని, వై. రవిశంకర్‌ నిర్మిస్తున్న సినిమా ఇది.
ఇదీ చదవండి: ఆ మూవీతో జెట్స్పీడ్లా దూసుకుపోయిన ఎన్టీఆర్!
