కశ్మీర్ ఫైల్స్ చిత్రంతో దేశవ్యాప్తంగా సంచలనం సృష్టించిన దర్శకుడు వివేక్ అగ్నిహోత్రి. తక్కువ బడ్జెట్‌తో నిర్మించిన ఆ చిత్రం బాక్సాఫీస్ వద్ద భారీ విజయాన్ని అందుకుంది. దీంతో ఆయన రూపొందించబోయే తర్వాతి సినిమాలపై సినీప్రియుల్లో భారీగా ఆసక్తి నెలకొంది. అలానే వివేక్ ఓ ఆసక్తికర ప్రాజెక్టుతో త్వరలోనే ప్రేక్షకుల ముందుకు రానున్నట్టు ఇటీవల ప్రకటించారు.
తాజాగా తన దర్శకత్వంలో 'ది వ్యాక్సిన్ వార్' సినిమా తీయబోతున్నట్లు తెలిపారు. పోస్టర్ను కూడా రిలీజ్ చేశారు. కరోనా మహమ్మారి, లాక్‌డౌన్, ప్రజలు పడిన ఇబ్బందులు, వ్యాక్సిన్ కోసం పడిగాపులు ఇలా ప్రతి అంశాన్ని ఈ చిత్రంలో చూపించనున్నారు.
అంతే కాదు, భారతీయ సినిమా చరిత్రలో తొలిసారి 11 భాషల్లో దీనిని విడుదల చేయనున్నారు. వచ్చే ఏడాది స్వాతంత్ర్య దినోత్సవం సందర్భంగా ఆగస్టు 15న ప్రేక్షకుల ముందుకు రానుంది. ఐ యామ్ బుద్ధ ప్రొడక్షన్ పతాకం పై పల్లవి జోషి ది వ్యాక్సిన్ వార్ నిర్మిస్తున్నారు. కశ్మీర్ ఫైల్స్ తీసిన అభిషేక్ అగర్వాల్ ఆర్ట్స్ పతాకంపై ఈ సినిమాను దేశవ్యాప్తంగా విడుదల చేయనున్నారు. నటీనటులు, ఇతర సాంకేతిక నిపుణుల వివరాలు త్వరలోనే వెల్లడించనున్నారు.
ఇదీ చూడండి: అర్జున్ కపూర్తో పెళ్లిపై ఒక్క పోస్ట్తో క్లారిటీ ఇచ్చేసిన మలైకా అరోరా
