Shahrukh Khan Pan Masala AD : బాలీవుడ్కు చెందిన ముగ్గరు సీనియర్ నటులకు అలహాబాద్ హైకోర్టు షాకిచ్చింది. పాన్ మసాల యాడ్స్లో ఈ మగ్గురు నటించినందున వారికి న్యాయస్థానం లీగల్ నోటీసులు జారీ చేసింది. ఈ నేపథ్యంలో బీ టౌన్ స్టార్స్ అక్షయ్ కుమార్, షారుక్ ఖాన్, అజయ్ దేవగన్లకు అలహాబాద్ హైకోర్టు నోటీసులు ఇచ్చింది. అయితే ఈ గుట్కా ప్రకటనలకు సంబంధించిన కేసును అటు హైకోర్టుతో పాటు సుప్రీంకోర్టు కూడా విచారిస్తోంది.
మోతీలాల్‌ యాదవ్‌ అనే న్యాయవాది గతంలో అలహాబాద్ హైకోర్టులో పిటిషన్‌ దాఖలు చేశారు. భారత ప్రభుత్వం నుంచి గౌరవప్రదమైన పురస్కారాలు అందుకున్న వారు ఇలాంటి యాడ్స్లో నటించడం సరికాదంటూ ఆ పిటిషన్‌లో పేర్కొన్నారు. ఈ క్రమంలో దీన్ని విచారించిన కోర్టు పిటిషనర్‌ అభ్యంతరాలపై తగిన చర్యలు తీసుకోవాలంటూ ప్రభుత్వాన్ని ఆదేశించింది. అయితే, ప్రభుత్వం నుంచి ఎలాంటి స్పందన లేదని పేర్కొంటూ ఇటీవల పిటిషనర్‌ మరోసారి కోర్టును ఆశ్రయించారు. దీంతో ఈ విషయంపై స్పందన కోరుతూ కోర్టు కేంద్రానికి నోటీసులు జారీ చేసింది.
ఈ నేపథ్యంలో ప్రభుత్వం తరఫున డిప్యూటీ సొలిసిటర్‌ జనరల్‌ ఎస్‌బీ పాండే శుక్రవారం కోర్టుకు సమాచారం అందించారు. ఇందులో భాగంగా అక్షయ్ కుమార్, షారుక్ ఖాన్, అజయ్ దేవ్‌గణ్‌కు అక్టోబర్‌ 22నే షోకాజ్‌ నోటీసులు జారీ చేశామని వెల్లడించారు.
మరోవైపు ఈ విషయంలో బిగ్బీ అమితాబ్ బచ్చన్ వెనక్కి తగ్గారు. గతంలో ఆయన ఓ పాన్ మసాలా యాడ్లో చేశారు. అయితే ఆ తర్వాత ఆ ప్రాజెక్టు నుంచి వెనక్కి తప్పుకుని కాంట్రాక్ట్ను బ్రేక్ చేసుకున్నారు. కానీ ఆ సంస్థ ఇంకా అమితాబచ్చన్కు సంబంధించిన ప్రకటనను టెలికాస్ట్ చేస్తున్నారట. దీంతో అమితాబ్ ఆ కంపెనీకి లీగల్ నోటీసులు పంపారని పాండే వెల్లడించారు. అయితే ఈ వ్యవహారంపై ఓ కేసు ఇప్పటికే సుప్రీంకోర్టు పరిధిలో ఉందని అందుకే ఇప్పటి పిటిషన్‌ను కొట్టివేయాల్సిందిగా ఆయన కోరారు. వాదనలు విన్న కోర్టు.. దీనిపై తదుపరి విచారణను 2024 మే 9కి వాయిదా వేసింది.
