బీజేపీ అగ్రనేత, కేంద్ర హోం మంత్రి అమిత్ షాతో మెగాస్టార్ చిరంజీవి, ఆయన కుమారుడు మెగా పవర్ స్టార్ రామ్ చరణ్ భేటీ అయ్యారు. ఆస్కార్ అవార్డు అందుకున్న తర్వాత అమెరికా నుంచి నేరుగా దిల్లీకి వచ్చిన చరణ్.. తన తండ్రితో కలిసి అమిత్ షాను మర్యాదపూర్వకంగా కలిశారు. శాలువా కప్పి పుష్పగుచ్ఛం అందించారు. అనంతరం ఈ ముగ్గురు కలిసి కాసేపు ముచ్చటించారు.
ఈ సందర్భంగా అమిత్ షా.. ఆర్ఆర్ఆర్ 'నాటు నాటు' సాంగ్కు 'బెస్ట్ ఒరిజినల్ సాంగ్' విభాగంలో ఆస్కార్ దక్కడం పట్ల చరణ్ను ప్రత్యేకంగా అభినందించారు. ఇంకా సినిమాకు సంబంధించిన విశేషాలను కూడా మాట్లాడుకున్నారు. అయితే ఈ భేటీ అటు సినీ, రాజకీయ వర్గాల్లో మాత్రం ఆసక్తికర చర్చకు దారి తీసింది. అయితే దిల్లీలో ఇండియా టుడే నిర్వహిస్తున్న రెండు రోజుల కాన్ క్లేవ్ సదస్సుకు రామ్ చరణ్ను ఆహ్వానించిన సంగతి తెలిసిందే. ఈ ప్రతిష్టాత్మకమైన ఈవెంట్లో ప్రధాని మోదీతో చరణ్ వేదికను పంచుకోనున్నారు. అందులో భాగంగానే చరణ్, చిరంజీవి.. అమిత్ షాను కలిశారు.
అంతకుముందు ఆస్కార్ ప్రదానోత్సవ కార్యక్రమంలో పాల్గొన్న దర్శకుడు రాజమౌళి, మ్యూజిక్ డైరెక్టర్ కీరవాణి, కాలభైరవ అండ్ టీమ్ కూడా నేడు(మార్చి 17)న హైదరాబాద్కు చేరుకున్నారు. జూనియర్ ఎన్టీఆర్ కూడా ఇప్పటికే అక్కడి నుంచి తిరిగి వచ్చేశారు. వీరందరికీ విమానాశ్రయంలో అభిమానులు గ్రాండ్గా వెల్కమ్ తెలిపారు. అలానే ఈ ప్రతిష్టాత్మకమైన ఆస్కార్ అవార్డు దక్కడం పట్ల ఆర్ఆర్ఆర్ టీమ్ మొత్తం హర్షం వ్యక్తం చేశారు. ఇక అమెరికా నుంచి నేరుగా భార్య ఉపాసనతో కలిసి దిల్లీకి వెళ్లిన చరణ్కు కూడా అభిమానులు ఘన స్వాగతం పలికారు. ఆ సమయంలో చరణ్ మాట్లాడుతూ.. 'నాటు నాటు' తమ ఒక్కరి పాట మాత్రమే కాదని.. ఇది అందరి పాట అని.. దేశ ప్రజలందరూ కలిసే దీన్ని ఆస్కార్ వరకు తీసుకెళ్లారని పేర్కొన్నారు.
దమ్కీ ప్రీ రిలీజ్ ఈవెంట్లో తారక్.. ఇకపోతే ఈ రోజే యంగ్ హీరో విశ్వక్ సేన్ నటించిన 'దాస్ కా దమ్కీ' ప్రీ రిలీజ్ ఈవెంట్ గ్రాండ్గా జరిగింది. ఈ ఈవెంట్కు ముఖ్య అతిథిగా ఎన్టీఆర్ హాజరయ్యారు. సినిమా విజయం సాధించాలని ఆశించారు. అలా ఒకే రోజు అటు రామ్చరణ్ దిల్లీలో.. తారక్ 'దమ్కీ' ప్రీ రిలీజ్ ఈవెంట్లో పాల్గొని సందడి చేశారు. కాగా, కొన్ని నెలల క్రితం ఎన్టీఆర్‌ను.. అమిత్ షా హైదరాబాద్‌లోని నోవాటెల్ హోటల్‌లో కలుసుకున్న సంగతి తెలిసిందే. ఆ సమయంలో వీరిద్దరు కలిసి దాదాపు 20 నిమిషాల పాటు ముచ్చటించుకున్నారు.
ఇదీ చూడండి: విశ్వక్ను చూసి షాక్ అయ్యా.. ఆ రోజే రియలైజ్ అయ్యా: ఎన్టీఆర్
