టాలీవుడ్లో ప్రస్తుతం సినిమా రీ రిలీజ్ ట్రెండ్ నడుస్తున్న సంగతి తెలిసిందే. ఇప్పటికే సూపర్స్టార్ మహేశ్ బాబు 'పోకిరి'.. పవన్ కల్యాణ్ 'జల్సా', 'తమ్ముడు', 'ఖుషీ'.. ప్రభాస్ 'బిల్లా', 'రెబల్' చిత్రాలు రీరిలీజ్ అయి మంచి కలెక్షన్స్ను అందుకున్నాయి. ఇప్పుడు జూ.ఎన్టీఆర్ నటించిన బ్లాక్బస్టర్ 'సింహాద్రి' సినిమా కూడా మే 20న రీరిలీజ్ అయ్యేందుకు సిద్ధమైంది.
అయితే జూనియర్ ఎన్టీఆర్కు విదేశాల్లోనూ మంచి క్రేజ్ ఉన్న సంగతి తెలిసిందే. దీంతో సింహాద్రి సినిమాను ఆస్ట్రేలియాలో కూడా రిలీజ్ చేస్తున్నారు. అక్కడ మెల్బోర్న్ సిటీలోని ఐమాక్స్ థియేటర్లో రీరిలీజ్ చేస్తున్నారు. ఈ ఐమాక్స్ ప్రపంచంలోనే అతి పెద్ద స్క్రీన్ ఉన్న థియేటర్గా ప్రత్యేక గుర్తింపు కూడా పొందింది. తాజాగా సోమవారం ఈ థియేటర్లో 'సింహాద్రి' బుకింగ్స్ను ఓపెన్ చేశారు. బుకింగ్స్ ప్రారంభమైన నిమిషాల వ్యవధిలోనే టిక్కెట్లన్నీ హాట్ కేకుల్లా అమ్ముడుపోయాయని తెలిసింది. ఆస్ట్రేలియాలో సైతం ఈ విధమైన రెస్పాన్స్ రావడం.. ఎన్టీఆర్కు విదేశాల్లో క్రేజ్ ఏ రేంజ్లో ఉందో అర్థం చేసుకోవచ్చు.
4k డాల్బీ అట్మాస్ టెక్నాలజీలో ఆడియెన్స్ను అలరించనుంది సింహాద్రి. ఈ సినిమాకు రీరిలీజ్లోనూ బీభత్సమైన హైప్ లభిస్తోంది. త్వరలోనే రెండు తెలుగు రాష్ట్రాల్లో సింహాద్రి బుకింగ్స్ అందుబాటులోకి తెచ్చే అవకాశం ఉంది. కాగా ఈ సినిమా అప్పట్లోనే పెద్ద విజయం సొంతం చేసుకుంది. ఫ్యామిలీ ఎంటర్టైనర్గా 2003లో విడుదలైన సింహాద్రి.. బాక్సాఫీస్ దగ్గర మంచి కలెక్షన్లను వసూలు చేసింది. సింగ‌మ‌లై, సింహాద్రి పాత్రల్లో ఎన్టీఆర్ ప‌వ‌ర్‌ఫుల్ యాక్టింగ్ అభిమానుల‌ను మెప్పించింది.ఈ సినిమాలో భూమికా చావ్లా, అంకిత హీరోయిన్లుగా, నాజర్ కీలక పాత్రలో నటించారు. ఎస్.ఎస్ రాజమౌళి ఆ సినిమాకు దర్శకత్వం వహించారు.
అదే బాటలో 'ఆది' రానుందా...? వి.వి వినాయక్ డైరెక్షన్లో ఫ్యాక్షన్ జోనర్లో తెరకెక్కిన 'ఆది' సినిమాను కూడా వచ్చే నెలలోనే రీరిలీజ్ చేయాలని సినిమా బృందం ప్లాన్ చేస్తున్నట్లు సమాచారం. ఈ సినిమాకు మణిశర్మ సంగీతం అందిచారు. ఆది సినిమాతో దర్శకుడు వీ.వీ వినాయక్ ఎన్టీఆర్లోని మరో కోణాన్ని ప్రేక్షకులకు పరిచయం చేశారు. అప్పట్లో ఈ సినిమా కూడా సూపర్ హిట్గా నిలిచింది.
ఇకపోతే ప్రస్తుతం తారక్.. కొరటాల శివ దర్శకత్వంలో ఎన్టీఆర్ 30 సినిమా చేస్తున్నారు. ఈ సినిమాలో అందాల తార దివంగత నటి శ్రీ దేవి కుమార్తె.. జాన్వీ కపూర్ హీరోయిన్గా నటిస్తున్నారు. ఈ సినిమాతో జాన్వీ కపూర్ టాలీవుడ్లోకి అడుగుపెట్టనున్నారు. బాలీవుడ్ స్టార్ యాక్టర్ సైఫ్ అలీఖాన్ ప్రతినాయకుడి పాత్రలో కనిపించనున్నారు.
