అక్కినేని యంగ్ హీరో నాగచైతన్య ప్రస్తుతం కెరీర్లో వరుసగా ఫ్లాప్లను ఎదుర్కొంటున్నారు. 'థ్యాంక్యూ', 'లాల్ సింగ్ చద్ధా' డిజాస్టర్గా నిలవడం వల్ల ఆయన తన కొత్త సినిమా 'కస్టడీ'పైనే భారీ ఆశలు పెట్టుకున్నారు. కానీ ఈ చిత్రం కూడా బాక్సాఫీస్ వద్ద ఆశించిన స్థాయిలో ఆడలేదు. అయితే ఈ రిజల్ట్ విషయాల్ని పక్కన పెడితే.. చైతూ ఈ చిత్రాలన్నింటినీ లైన్లో పెట్టడంతో పాటు ఓటీటీ డెబ్యూకు కూడా రెడీ అయ్యారు. ఇందులో భాగంగానే 'దూత' అనే హారర్ వెబ్సిరీస్లోనూ నటించారు. చాలా కాలం క్రితమే ఇది షూటింగ్ కూడా పూర్తి చేసుకుంది. కానీ ఇది ఎప్పుడు వస్తుందనే భేతాళ ప్రశ్నకు మాత్రం సమాధానం అస్సలు దొరకడం లేదు. నెలల క్రితమే ఈ వెబ్సిరీస్కు సంబంధించి ఓ ఈవెంట్ కూడా జరిగింది. ఇందులో పాత్రలను కూడా పరిచయం చేశారు. అమెజాన్ ప్రైమ్.. ఈ సిరీస్ను భారీ బడ్జెట్తో తెరకెక్కించింది.
అయితే ఈ సిరీస్ రిలీజ్కు జాప్యం జరగడానికి వెనక రకరకాల ఊహాగానాలు వినిపిస్తున్నాయి. ఈ సిరీస్ కోసం పాన్ ఇండియా రేంజ్లో అన్ని భాషల్లో ప్రమోట్ చేయాలి. దీనికి హీరో, దర్శకుడి ఇమేజ్తో మార్కెట్ కూడా కీలకం. అయితే డైరెక్టర్ విక్రమ్ కుమార్.. 'థాంక్యూ' చిత్రం రిజల్ట్తో దెబ్బతిని ఉన్నారు. మరోవైపు ప్రస్తుతం చైతూ మార్కెట్ కూడా కాస్త డల్గానే ఉంది. 'లాల్ సింగ్ చద్ధా', 'థ్యాంక్యూ'లో ఏదైనా ఒకటి హిట్ అయి ఉంటే పరిస్థితి మరోలా ఉండేది. కానీ అది జరగలేదు. దీంతో అమెజాన్.. 'దూత' సిరీస్ను వాయిదా వేస్తూ వస్తోందని టాక్ నడుస్తోంది.
ఇకపోతే 'దూత' హారర్ జానర్. ఇటువంటి జానర్కు ఓటీటీలో ప్రేక్షకులు ప్రత్యేకంగా ఉంటారు. అయితే దూత ఫైనల్ ఔట్పుట్ పట్ల అమెజాన్ టీమ్ అంత సంతృప్తికరంగా లేదని కూడా అంటున్నారు. అందుకే సిరీస్లో కొన్ని కీలక మార్పులు చేయాలని అమెజాన్ రికమండ్ చేసిందని.. వాటిని సరిచేసే పని వల్లే ఆలస్యమవుతోందనే కారణం కూడా వినిపిస్తోంది. మరి ఈ రెండింటిలో ఏ కారణమో సరిగ్గా తెలీదు కానీ.. గతేడాది నుంచి 'దూత' పేరు కూడా వినపడట్లేదు. అసలు ఎవ్వరూ ఆలోచించట్లేదు. మరి ఈ సిరీస్కు ఎప్పుడు మోక్షం కలుగుతుందో.. కాగా, ఈ 'దూత' సిరీస్లో ప్రియా భవానీ శంకర్‌ కథానాయికగా నటించింది. ఇందులో నాగచైతన్య ఇప్పటి వరకూ కనిపించని లుక్‌లో దర్శనమివ్వనున్నారట.
ఇదీ చూడండి: SSMB 28 Title : 'గుంటూరు'పై మనసు పడిన మహేశ్!
