Modi Biopic By Johnny Depp : 'పైరేట్స్ ఆఫ్ ది కరేబియన్' సినిమాతో ప్రపంచవ్యాప్తంగా గుర్తింపు పొందారు హాలీవుడ్ నటుడు జానీ డెప్. దాదాపు 25 ఏళ్ల విరామం తర్వాత ఈ యాక్టర్ మొదటి సారి మెగా ఫోన్ పట్టుకోబోతున్నారని తెలుస్తోంది. ఈ మేరకు ఆయన ఓ ప్రకటనలో పేర్కొన్నట్లు సమాచారం. 'మోదీ' జీవితం ఆధారంగా ఓ సినిమా తెరకెక్కిస్తున్నారని తెలుస్తోంది. ఇప్పటికే ఈ సినిమా కోసం ప్రముఖ ఇటాలియన్ నటుడు రికార్డో స్కామార్సియోతో పాటు పెర్రీ నీనే, అల్ పాసినో లాంటి ప్రముఖ నటులను ఎంపిక చేశారు. దీంతో ఈ 'మోదీ' బయోపిక్ భారత ప్రధానమంత్రి నరేంద్ర మోదీదే అని సోషల్ మీడియాలో వైరల్ అయింది.
అయితే, జానీ డెప్ 'మోదీ' పేరుతో ఓ సినిమా చేస్తున్నారు. కానీ అది నరేంద్ర మోదీ బయోపిక్ కాదు. పెయింటర్, శిల్పి అయిన అమెడియో మోదీగ్లియాని అనే ఇటాలియన్ కళారుడు జీవిత కథ ఆధారంగా ఈ సినిమాను తెరకెక్కిస్తున్నారు. 1916లో మోదీ గ్లియాని పారిస్లో ఉన్నప్పుడు జరిగిన సంఘటనల ఆధారంగా ఈ సినిమాను రూపొందిస్తున్నారు. కాగా, విషయంపై జానీ డెప్ ఇంతవరకు స్పందించలేదు. ఈ సినిమా నిర్మాత బారీ నావి స్పందిస్తూ.. కళాకారుడిగా మోదీ గ్లియాని ఎలాంటి పరిస్థితులను ఎదుర్కొన్నారు.. తన గుర్తింపు కోసం ఎలాంటి కష్టాలు ఎదుర్కొన్నారు అనే విషయాల ఆధారంగా సినిమా ఉంటుందని హింట్ ఇచ్చారు. ఈ సినిమా షూటింగ్ త్వరలో బుడాపెస్ట్లో జరగనుంది. 'మోదీ' బయోపిక్కు సంబంధించి ఇతర తారాగణాన్ని ఎంపిక చేసే పనిలో ఉంది చిత్ర యూనిట్.
జానీ డెప్.. రచయిత, నటుడు, సింగర్, నిర్మాతగా ప్రపంచవ్యాప్తంగా గుర్తింపు సంపాదించారు. 9 జూన్ 1963న జన్మించిన జానీ డెప్.. 1984లో వచ్చిన 'ఎ నైట్మేర్ ఆన్ ఎల్మ్ స్ట్రీట్' అనే సినిమాతో తెరంగేట్రం చేశారు. ఆ తర్వాత వరుస సినిమాలతో అగ్రనటుడిగా ఎదిగారు. 1997లో 'ది బ్రేవ్' చిత్రం ద్వారా దర్శకుడిగా వెండితెరకు పరిచయమయ్యారు డెప్.
ఇప్పటికే ప్రధాని నరేంద్ర మోదీ బయోపిక్ ఒకటి వచ్చింది. బాలీవుడ్ నటుడు వివేక్ ఒబెరాయ్ మోదీ పాత్రలో 'పీఎమ్ నరేంద్ర మోదీ' అనే పేరుతో ఓ సినిమా విడుదలైంది. ఇదే కాకుండ దిగ్గజ బాలీవుడ్ డైరక్టర్ సంజయ్ లీలా బన్సాలీ దర్శకత్వంలో మన్ 'బైరాగి' అనే మరో చిత్రం కూడా తెరకెక్కింది. ఈ సినిమాలో మోదీ గురించి ప్రజలకు తెలియని కథను చూపించారు. యువకుడిగా, ఆర్ఎస్ఎస్ కార్యకర్తగా ప్రయాణం మొదలుపెట్టిన మోదీని ఈ చిత్రంలో చూపించారు.
