Mahesh Babu Dubai Villa : టాలీవుడ్ సూపర్ స్టార్ మహేశ్ బాబుకు విహారయాత్రలు అంటే ఇష్టమని అందరికీ తెలుసు. వరుస సినిమాలతో దూసుకెళ్తున్న ఈ హీరో కొంచెం గ్యాప్ దొరికినా.. కుటుంబంతో సహా టూర్లకు వెళతారు. ఇప్పటికే ఆయన పారిస్, జర్మనీ ట్రిప్లకు వెళ్లొచ్చారు. తాజాగా మరోసారి విదేశీ యాత్ర చేపట్టారు మహేశ్. ఈసారి ఎడారి దేశం దుబాయ్కు వెళ్లారు. అయితే, మహేశ్ దుబాయ్ ట్రిప్పై సోషల్ మీడియాలో ఓ వార్త చక్కర్లు కొడుతోంది. ఇటు సినిమాలు, అటు వ్యాపారాలతో రెండు చేతులా సంపాదిస్తున్న ఈ హీరో.. దుబాయ్లో ఓ ఖరీదైన విల్లాను కొనుగోలు చేసినట్లు సమాచారం. ఈ ఇండిపెండెంట్ విల్లాకు సంబంధించిన రిజిస్ట్రేషన్ ప్రక్రియ కోసమే దుబాయ్ వెళ్లారని వార్తలు వస్తున్నాయి. ఈ రిజిస్ట్రేషన్ ప్రక్రియ రెండు రోజులు జరగనుందని టాక్ వినిపిస్తోంది. అయితే, ఈ విషయానికి సంబంధించి మహేశ్ బాబు అధికారికంగా స్పందించలేదు.
గతేడాది మే 12న సర్కారు వారి పాట సినిమా విడుదలైంది. అప్పటి నుంచి మహేశ్ థియేటర్లలో సందడి చేయలేదు. ప్రస్తుతం ఈ స్టార్ హీరో ప్రముఖ దర్శకుడు త్రివిక్రమ్ శ్రీనివాస్ దర్శకత్వంలో SSMB 28 సినిమా చేస్తున్నారు. ఇప్పటికే ప్రారంభమైన ఈ సినిమాకు కొన్ని అడ్డంకులు తప్పేలా లేవు. ఇందుకు కారణం హీరో మహేశ్, త్రివిక్రమ్ల మధ్య సఖ్యత లోపించిందనే కారణం మాత్రం ఫిల్మ్ నగర్ వర్గాల్లో పెద్ద ఎత్తున ప్రచారమైతే జరుగుతోంది. కానీ ఈ గాసిప్స్ను నిర్మాత సూర్యదేవర నాగవంశీ కొట్టిపారేశారు. అటువంటిది ఏమిలేదని డైరెక్టర్, హీరోల మధ్య బాండింగ్ బాగానే ఉందని చెబుతున్నారు. అయితే తాజాగా మహేశ్ ఫారిన్ టూర్కు వెళ్లడం వల్ల ఈ మూవీ షూటింగ్ షెడ్యూల్ మరింత ఆలస్యమయ్యే సూచనలు కనిపిస్తున్నాయి. కాగా, మహేశ్ తాజా ట్రిప్తో వస్తున్న ఊహాగానాలకు మరింత బలం చేకూరినట్లయిందని సినీ క్రిటిక్స్ అంటున్నారు
'SSMB 28'లో మూడో సారి కలసి పనిచేస్తున్నారు మహేశ్, త్రివిక్రమ్. అంతకుముందు.. ఈ ఇద్దరి కాంబినేషన్లో వచ్చిన 'అతడు', 'ఖలేజా' బ్లాక్బస్టర్లుగా నిలిచాయి. ఇక ఈ చిత్రంలో మహేశ్ సరసన పూజా హెగ్డే రెండో సారి ఆడిపాడనుంది. 2019లో వచ్చిన మహర్షి సినిమాలో మహేశ్తో ఓ సారి స్క్రీన్ షేర్ చేసుకుందీ బ్యూటీ. ఈ సినిమాలో శ్రీలీల, రమ్య క్రిష్ణన్, ప్రకాశ్ రాజ్ ప్రధాన పాత్రలు పోషిస్తున్నారు. నవిన్ నూలీ ఎడిటర్గా వ్యవహరిస్తుండగా తమన్ ఎస్ సంగీతం సమకూరుస్తున్నారు. కొరియోగ్రాఫర్గా రామ్-లక్ష్మణ్, సినిమాటోగ్రాఫర్గా పీఎస్ వినోద్, ఆర్ట్ డైరెక్టర్ ఏఎస్ ప్రకాశ్ పనిచేస్తున్నారు. ఈ సినిమా పూర్తైన తర్వాత దిగ్గజ దర్శకుడు రాజమౌళితో 'SSMB 29' చేయనున్నారు.
