Saindhav Nawazuddin First Look : టాలీవుడ్ సీనియర్ హీరో విక్టరీ వెంకటేశ్ కథానాయకుడిగా యంగ్ డైరెక్టర్ శైలేష్ కొలను దర్శకత్వంలో 'సైంధవ్' అనే సినిమా తెరకెక్కుతున్న విషయం తెలిసిందే. హిట్ 2 సినిమాతో భారీ బ్లాక్ బస్టర్ అందుకున్న శైలేష్ కొలను విక్టరీ వెంకటేశ్తో సినిమా చేస్తాడని ఎవరూ అనుకోలేదు. దీంతో ఈ క్రేజీ కాంబోపై భారీ అంచనాలు నెలకొన్నాయి. ఆ అంచనాలకు ఏమాత్రం తగ్గకుండా ఈ సినిమా ఉండబోతున్నట్లు ఇటీవలే టీజర్ గ్లిమ్స్ వీడియోతో చెప్పకనే చెప్పారు మేకర్స్. ప్రస్తుతం షూటింగ్ శరవేగంగా జరుపుకుంటున్న ఈ సినిమాలో వెంకటేశ్ను ఇప్పటివరకు మునుపెన్నడూ చూడని పాత్రలో డైరెక్టర్ శైలేష్ చూపించబోతున్నారు.
అయితే ఈ సినిమాలో బాలీవుడ్ అగ్ర నటుడు నవాజుద్దీన్ సిద్ధిఖీ ఓ కీలక పాత్రలో నటిస్తున్నారు. శుక్రవారం.. ఆయన పుట్టినరోజు సందర్భంగా తాజాగా నవాజుద్దీన్ సిద్ధిఖీ క్యారెక్టర్ ఫస్ట్ లుక్ పోస్టర్ను విడుదల చేశారు మేకర్స్. ఈ మూవీలో నమాజుద్దీన్ 'వికాస్ మాలిక్' అనే పాత్రలో కనిపించనున్నారు. ఈ మేరకు విడుదల చేసిన ఫస్ట్ లుక్ పోస్టర్లో నమాజుద్దీన్ లగ్జరీ కారుపై కూర్చుని, బీడీ తాగుతూ కనిపించారు. వెంకటేశ్ కెరీర్లోనే 75వ సినిమాగా రూపొందుతున్న ఈ సినిమాను నిహారిక ఎంటర్టైన్మెంట్స్ బ్యానర్పై వెంకట్ బోయినపల్లి నిర్మిస్తుండగా.. కిషోర్ తాళ్లూరు సహ నిర్మాతగా వ్యవహరిస్తున్నారు. సంతోష్ నారాయణ్ సంగీతం అందిస్తున్నారు. వెంకటేశ్ సరసన శ్రద్ధా శ్రీనాథ్, రుహానీ శర్మ, ఆండ్రియా జెర్మియా ఏకంగా ముగ్గురు హీరోయిన్లు నటిస్తున్నారు.
సుధీర్ మూవీకి ఇంట్రెస్టింగ్ టైటిల్
Sudheer Movie Title : జబర్దస్త్ కమెడియన్‌గా కెరీర్ మొదలుపెట్టి హీరోగా ఎదిగిన సుడిగాలి సుధీర్.. ప్రస్తుతం ఆచితూచి అడుగులు ముం:దుకు వేస్తున్నారు. గాలోడు సినిమాతో హిట్ అందుకున్న ఈ యంగ్ హీరో.. ఇటీవల తన నాలుగో సినిమాను మొదలుపెట్టారు. ఇండస్ట్రీలోని బడా నిర్మాతల సమక్షంలో సుడిగాలి సుధీర్ సినిమా ఘనంగా ప్రారంభమైంది. పాగల్ ఫేమ్ నరేశ్ కుప్పిలి దర్శకత్వం వహిస్తున్న ఈ సినిమాను లక్కీ మీడియా, మహారాజా క్రియేషన్స్ బ్యానర్లపై చంద్రశేఖర్ రెడ్డి మొగుళ్ల, బెక్కం వేణుగోపాల్ నిర్మిస్తున్నారు. సుడిగాలి సుధీర్ సరసన దివ్య భారతి హీరోయిన్‌గా నటిస్తున్నారు. ఈమెకు ఇదే తొలి తెలుగు సినిమా. శుక్రవారం సుడిగాలి సుధీర్ పుట్టినరోజు సందర్భంగా ఈ సినిమా టైటిల్‌ను ప్రకటించారు. GOAT - గ్రేటెస్ట్ ఆఫ్ ఆల్ టైమ్స్ అనే ఆసక్తిక టైటిల్‌ను ఈ సినిమాకు పెట్టారు.
సిద్ధార్థ్ టక్కర్ రిలీజ్ డేట్ ఫిక్స్
Siddharth Takkar Movie Release Date : నువ్వొస్తానంటే నేనొద్దంటానా, బొమ్మరిల్లు వంటి సినిమాలతో తెలుగు ప్రేక్షకులకు దగ్గరైన హీరో సిద్ధార్థ్.. త్వరలో టక్కర్ సినిమాతో అలరించడానికి సిద్ధమవుతున్నారు. ఈ చిత్రానికి కార్తీక్ జి. క్రిష్ దర్శకత్వం వహించారు. పీపుల్ మీడియా ఫ్యాక్టరీ అధినేత టీజీ విశ్వప్రసాద్ ఈ చిత్రాన్ని అభిషేక్ అగర్వాల్ ఆర్ట్స్, పాషన్ స్టూడియోస్‌తో కలిసి నిర్మించారు. వివేక్ కూచిభొట్ల సహ నిర్మాతగా వ్యవహరిస్తున్న ఈ సినిమాలో దివ్యాంశ కౌశిక్ కథానాయికగా నటించారు. ఈ చిత్రాన్ని జూన్ 9న తెలుగు, తమిళ భాషల్లో విడుదల చేస్తున్నట్లు తాజాగా చిత్ర బృందం ప్రకటించింది.
