Krrish 4 Shooting : బాలీవుడ్ స్టార్ హీరో హృతిక్ రోషన్ ప్రధాన పాత్రలో తెరకెక్కిన 'క్రిష్' సిరీస్కు ప్రేక్షకుల్లో ఉన్న క్రేజ్ అంతా ఇంతా కాదు. 'కోయీ మిల్ గయా' అనే సినిమాతో 20 ఏళ్ల క్రితం ప్రారంభమైన ఈ సిరీస్.. ఆ తర్వాత 'క్రిష్ 2', 'క్రిష్ 3' చిత్రాలతో ఓ దేశవ్యాప్తంగా ప్రజాదరణ పొందింది. ఇందులో హృతిక్తో పాటు కంగనా రనౌత్, ప్రియాంక చోప్రా, వివేక్ ఒబెరాయ్ లాంటి స్టార్స్ కీలక పాత్రలు పోషించారు. అయితే 2013లో 'క్రిష్ 3' విడుదలైన తర్వాత ఈ చిత్రానికి సీక్వెల్ ఉంటుందని మేకర్స్ ప్రకటించారు. దీంతో అభిమానులు రానున్న ప్రాజెక్ట్ గురించి ఎంతగానో ఎదురుచూశారు. కానీ కొన్ని కారణాల వల్ల ఆ ప్రాజెక్ట్ పట్టాలెక్కలేదు. దీంతో ఫ్యాన్స్కు నిరాశే ఎదురైంది.
అయితే తాజాగా ఈ సినిమా గురించి ఓ అప్టేట్ నెట్టింట తెగ ట్రెండ్ అవుతోంది. త్వరలోనే ఈ సినిమాను తెరకెక్కించే పనుల్లో హృతిక్ బిజీ అయిపోయారట. తన తండ్రి రాకేశ్ రోషన్ రాసిన స్క్రిప్ట్‌ను ఖరారు చేసినట్లు సమాచారం. అయితే ఆ కథను హృతిక్ సమీక్షించి, కొన్ని మార్పులను చేశారట. ప్రీ ప్రొడక్షన్ పనులు ముగించుకుని ఈ చిత్రాన్ని వచ్చే ఏడాది ఫిబ్రవరి లేదా మార్చిలో సెట్స్పైకి తీసుకెళ్లేందుకు ప్లాన్ చేస్తున్నారట. ఇందులో భాగంగా తన పాత్ర కోసం పూర్తి ఫిట్‌గా అయ్యేందుకు హృతిక్ కసరత్తులు చేస్తున్నట్లు సమాచారం.
మరోవైపు షూటింగ్ లోకేషన్ గురించి కూడా మూవీ టీమ్ రీసెర్చ్ చేస్తోందట. అంతర్జాతీయ వేదికలపై ఈ సినిమాను చిత్రీకరించేందుకు సన్నాహాలు జరుగుతున్నాయని సమాచారం. ఇందులో భాగంగా పలు కీలక సన్నివేశాలను తెరకెక్కించేందుకు సింగపూర్ను ఎంచుకున్నారని టాక్ . అయితే బడ్జెట్కు అనుగుణంగానే లోకేషన్ల ఎంపిక జరగనుందని సమాచారం. అంతే కాకుండా ఈ సినిమాలో ఫీమేల్ లీడ్ కోసం ప్రియాంక చోప్రాను మూవీ మేకర్స్ సంప్రదించనున్నారని సనీ వర్గాల టాక్.
Krrish 4 Story Line : ఇక అప్పట్లో ఈ సినిమాకు సంబంధించిన ఓ స్టోరీ లైన్ నెట్టింట తెగ ట్రెండ్ అయ్యింది. అంతరిక్ష నేపథ్యం, టైమ్‌ ట్రావెల్ స్టోరీగా ఈ సినిమా రానున్నట్లు ప్రచారం జరిగింది. ముఖ్యంగా క్రిష్ తండ్రి రోహిత్‌ మెహ్రాను టైం ట్రావెల్ సహాయంతో వెనక్కి తీసుకురావడమే (బ్రింగ్‌ బ్యాక్‌ రోహిత్‌ మెహ్రా) ప్రధానాంశంగా క్రిష్-4 కథనం ఉంటుందని.. 'జాదు'కి కూడా కీలకపాత్ర ఉంటుందని టాక్ వినిపించింది. మరోవైపు ఈ సినిమాలో ఇద్దరు హీరోలు ఉంటారని, ప్రధాన పాత్రను హృతిక్ పోషించగా, సౌత్‌ ఇండస్ట్రీ నుంచి మరో పెద్ద హీరోని కూడా దృష్టిలో పెట్టుకుని సినిమా కథ సిద్ధం చేస్తున్నట్లు అప్పట్లో వార్తలు వచ్చాయి. ఏదేమైనా 'క్రిష్-4'ను అత్యాధునిక సూపర్ హీరో సైన్స్‌ ఫిక్షన్‌ సినిమాగా రూపొందించనున్నారట.
