Mahesh Billgates: ప్రపంచ శ్రీమంతుల్లో బిజినెస్ టైకూన్ బిల్గేట్స్ ఒకరు. ఆయ‌న‌కు మన దేశంతో మంచి అనుబంధం ఉంది. తాజాగా ఈ ప్రపంచ శ్రీమంతుడిని మన వెండితెర శ్రీమంతుడు మహేశ్బాబు క‌లిశారు. అందుకు సంబంధించిన ఫొటోను సోషల్ మీడియాలో షేర్ చేశారు. ఆ ఫొటో చూసిన అభిమానులు, నెటిజన్లు తెగ సంబరపడుతున్నారు.
ప్ర‌స్తుతం మహేశ్.. ఫ్యామిలీతో కలిసి అమెరికాలో వెకేష‌న్‌ను ఎంజాయ్ చేస్తున్నారు. పలు ప‌ర్యట‌క ప్రాంతాల‌ను సంద‌ర్శిస్తున్నారు. ఫ్యామిలీతో ఉన్న ఫొటోల‌ను అభిమానులతో పంచుకుంటున్నారు. ఈ క్రమంలోనే న్యూయార్క్ న‌గరంలో బిల్గేట్స్ను మహేశ్ క‌లుసుకున్నారు. ఆ ఫొటో షేర్ చేస్తూ.. "నిజంగా బిల్గేట్స్ను కలవడం చాలా ఆనందంగా ఉంది.. ఈ ప్రపంచం చూసిన గొప్ప దార్శనికుల్లో ఆయన ఒకరు. అంతేకంటే ఎంతో వినమ్రతతో ఉంటారు. నిజంగా అందరికీ ఆయనో స్ఫూర్తి!!" అని మహేశ్ బాబు తన ట్విట్టర్ వేదికగా పేర్కొన్నారు.
ఆ ఫొటోను చూసిన మహేశ్ అభిమానులు.. క్రేజీ కామెంట్లు పెడుతున్నారు. 'అన్నా బిజినెస్‌మేన్ 2' తీయ‌మ‌ని కొంద‌రు స‌ల‌హా ఇస్తుంటే.. మ‌రికొందరు అమెరికా ప్రెసిడెంట్ బైడెన్‌తో ఉన్న ఫొటోను షేర్ చేయ‌మ‌ని రిక్వెస్ట్ చేస్తున్నారు. ఇక సినిమాల విష‌యానికి వ‌స్తే .. ఈ ఏడాది 'స‌ర్కారు వారి పాట' చిత్రంతో స‌క్సెస్ అందుకున్న మహేశ్.. త‌దుప‌రి త్రివిక్ర‌మ్ ద‌ర్శ‌క‌త్వంలో సినిమా చేయ‌డానికి రెడీ అవుతున్నారు. ఈ సినిమాకు సంబంధించిన ప్రీ ప్రొడ‌క్ష‌న్ ప‌నులు శ‌ర‌వేగంగా జ‌రుగుతున్నాయి. దర్శకుడు రాజ‌మౌళి కూడా మహేశ్ కోసం క‌థ‌ను సిద్ధం చేసే ప‌నిలో బిజీగా ఉన్నారు.
ఇవీ చదవండి: మరోసారి తండ్రైన దిల్రాజు.. పండంటి మగబిడ్డకు జన్మనిచ్చిన తేజస్విని
