Neelima Guna Wedding Reception: టాలీవుడ్‌ ప్రముఖ దర్శకుడు గుణశేఖర్ తనయ నీలిమ వెడ్డింగ్‌ రిసెష్షన్‌ వైభవంగా జరిగింది. ఈ వేడుకకు రాజకీయ, సినీ ప్రముఖులు హాజరై, నవ దంపతులను ఆశీర్వదించారు. అగ్ర కథానాయకులు మహేశ్‌బాబు, అల్లు అర్జున్, రాజశేఖర్ దంపతులు, దర్శకుడు రాజమౌళి దంపతులు, కె.రాఘవేంద్రరావు, సంగీత దర్శకుడు మణిశర్మ, భాజపా జాతీయ ప్రధాన కార్యదర్శి పురందేశ్వరి తదితరులు పాల్గొన్నారు.
'బాల రామాయణం', 'చూడాలని ఉంది', 'ఒక్కడు', 'అర్జున్', 'వరుడు', 'రుద్రమదేవి' తదితర చిత్రాలతో ప్రేక్షకులను అలరించిన గుణ శేఖర్‌ పెద్ద కుమార్తె నీలిమ. 'రుద్రమదేవి'కి సహ నిర్మాతగా వ్యవహరించిన ఆమె 'శాకుంతలం' సినిమాతో నిర్మాతగా మారారు. సమంత ప్రధాన పాత్రధారిగా గుణ శేఖర్‌ తెరకెక్కించిన ఆ చిత్రం వచ్చే ఏడాది విడుదల కానుంది. వ్యాపారవేత్త అయిన రవి ప్రక్యాతో నీలిమ ఈ నెల 3న వివాహ బంధంలోకి అడుగుపెట్టారు.
