మన ఫేవరట్ హీరో లేదా హీరోయిన్ చిన్నప్పుడు ఎలా ఉండే వారు ఏం చేసేవారో అని ఉత్సుకత మనకు ఎప్పుడూ ఉంటుంది. వారి గురించి ఇంకా తెలుసుకోవాలని ఎప్పుడూ ఆసక్తి కనబరుస్తూనే ఉంటాం. అలానే ఆ స్టార్స్ కూడా అప్పుడప్పుడు తమ గురించి చెప్పడమో లేకుంటే తమకు సంబంధించిన మధుర జ్ఞాపకాలను ఫొటోల రూపంలో షేర్ చేయడమో చేస్తుంటారు. అందుకే సోషల్ మీడియాలో ఇటువంటి విషయాలు తెగ ట్రెండ్ అవుతుంటాయి. అయితే ఇటీవలే ఓ స్టార్ హీరో తన చిన్ననాటి ఫొటోను షేర్ చేశారు. ఆయన చిన్నప్పడు మహాత్మ గాంధీ వేషంలో ఉన్న సమయంలో తీసిన ఫొటోను నెట్టింట్లో అప్లోడ్ చేశారు.
అయితే ఈ ఫొటోను చూసిన వెంటనే కచ్చితంగా ఆయన్ను గుర్తుపట్టడం కష్టమే అనుకోండి. ఓ ప్రముఖ నిర్మాత తనయడైన ఈ స్టార్ హీరో.. ప్రస్తుతం హిట్లు, ఫ్లాపులతో సంబంధం లేకుండా వరుసగా సినిమాలు చేసుకుంటూ దూసుకుపోతున్నారు. టాలీవుడ్లో వరుసపెట్టి సినిమాల్లో నటించిన ఈ స్టార్ హీరో త్వరలోనే బాలీవుడ్లోకి ఎంట్రీ ఇవ్వనున్నాడు. ఇప్పటికే అక్కడ ఛత్రపతిగా పేరు తెచ్చుకున్నాడు! ఇప్పటికీ గుర్తుపట్టలేదా. ఇంతకీ మహాత్మ గాంధీ వేషంలో ఉన్న ఈ కుర్రోడు ఎవరంటే. ఆయనే మన టాలీవుడ్ హీరో బెల్లంకొండ సాయి శ్రీనివాస్.
'అల్లుడు శ్రీను', 'జయ జానకీ నాయక','రాక్షసుడు', 'సీత' , 'సాక్ష్యం' లాంటి సినిమాల్లో నటించిన ఈ స్టార్ హీరో జయాపజాలను లెక్కచేయకుండా ఇండస్ట్రీలో మంచి పేరు సంపాదించుకున్నారు. ఇటీవలే రాజమౌళి తెరకెక్కించిన సూపర్ హిట్ సినిమా ఛత్రపతి రీమేక్లో నటిస్తున్నారు. వీవీ వినాయక్ తెరకెక్కిస్తున్న ఈ సినిమా మే 12న రిలీజయ్యేందుకు సిద్ధంగా ఉంది. బాలీవుడ్లో ఈయనకు ఇది తొలి సినిమా అయినప్పటికీ తన తెలుగు సినిమాలు హిందీ వెర్షన్లో చూసిన అభిమానులకు ఈయన సుపరిచితుడే. అంతేకాకుండా ఈయన నటించిన 'రాక్షసుడు','జయ జానకీ నాయక','సీత' లాంటి సినిమాలన్నీ హిందీ వెర్షన్లో హిట్ అయ్యి యూట్యూబ్లో సంచలనాలు సృష్టించాయి.
కాగా, 2014లో రిలీజైన 'అల్లుడు శ్రీను' సినిమాతో టాలీవుడ్లోకి ఎంట్రీ ఇచ్చిన ఆయన.. తన డ్యాన్సులు, ఫైట్లతో అటు క్లాస్తో పాటు ఇటు మాస్ ఆడియన్స్ను ఆకట్టుకున్నారు. 'జయ జానకి నాయక' సినిమాతో మంచి నటుడిగా గుర్తింపు పొందారు. ఈ సినిమా హిందీ డబ్బింగ్ వెర్షన్ యూట్యూబ్లో రికార్డు స్థాయిలో వ్యూస్ సాధించింది. అయితే ఈయన నటించిన సినిమాలన్నీ బాక్సాఫీస్ వద్ద మంచి వసూళ్లు సాధించలేకపోతున్నాయి. అయినప్పటికీ అభిమానుల్లో ఈయనకున్న క్రేజ్ ఇంతకింత పెరుగుతూనే ఉంది.
