Balagam Venu Daughter : బాక్సాఫీస్ వద్ద వసూళ్ల వర్షం కురిపించిన 'బలగం' సినిమా దర్శకుడు వేణు.. మరోసారి తండ్రయ్యారు. ఆయన భార్య పండంటి ఆడబిడ్డకు జన్మనిచ్చారు. ఈ విషయాన్ని ఆయనే సోషల్మీడియా వేదికగా తెలిపారు. "ఆడబిడ్డతో ఆశీర్వాదం పొందాం. ఈ శుభవార్తను నా పెద్ద కుటుంబంతో పంచుకోవడం నాకు ఎనలేని ఆనందాన్ని ఇస్తుంది" అని పోస్ట్ చేశారు. తన కుమార్తెతో దిగిన ఫొటోను కూడా షేర్ చేశారు.
Balagam Venu Family : టాలీవుడ్‌లో గుర్తుండిపోయే సినిమాల్లో 'బలగం' కచ్చితంగా ఉంటుంది. ఎందుకంటే తెలంగాణ గ్రామీణ నేపథ్య కథతో తీసిన ఈ సినిమా అద్భుతమైన విజయాన్ని అందుకుంది. అప్పటివరకు కమెడియన్గా అందరికీ తెలిసిన వేణులో ఇంతమంచి దర్శకుడు ఉన్నారని బయటపడింది. ఇకపోతే వేణుకు ఇదివరకే ఓ కుమారుడు ఉన్నాడు. ఇద్దరూ కలిసి యూట్యూబ్ ఛానెల్‌లో పలు వీడియోస్ కూడా చేశారు.
మళ్లీ దిల్రాజుతోనే..
Balagam Venu New Movie : 'బలగం' తర్వాత మళ్లీ నిర్మాత దిల్ రాజు నిర్మాణంలో వేణు మరో సినిమా చేయబోతున్నారని ప్రచారం జరుగుతోంది. ఇందులో 'బలగం'లో నటించిన ప్రియదర్శినే హీరోగా నటిస్తున్నారని టాక్ వినిపిస్తోంది. అయితే ఈ ప్రాజెక్ట్కు సంబంధించి ఎలాంటి వివరాలు అధికారికంగా రాలేదు.
బలగం మూవీకి అవార్డుల పంట
Balagam Movie Awards : 'బలగం' చిత్రం ఈ ఏడాది మార్చి 3న విడుదలై ప్రేక్షకులను విశేషంగా ఆకట్టుకుంది. మొత్తం ప్రతిష్టాత్మక తొమ్మిది పురస్కారాలను అందుకుంది. అంతర్జాతీయ ఫిల్మ్ ఫెస్టివల్స్లోనూ సత్తా చాటింది. లాస్‌ ఏంజిల్స్‌ సినిమాటోగ్రఫీ అవార్డులతో పాటు 'వాషింగ్టన్‌ డీసీ ఇంటర్నేషనల్‌ సినిమా ఫెస్టివల్‌', 'ఒనికో ఫిల్మ్ అవార్డు' వంటి పలు విదేశీ అవార్డులను కూడా ముద్దాడింది. ఈ చిత్రంలో ప్రియదర్శి, కావ్య కల్యాణ్‌ రామ్, సుధాకర్‌ రెడ్డి, రూపా లక్ష్మి, ముర‌ళీధ‌ర్ గౌడ్‌ తదితరులు ప్రధాన పాత్రలు పోషించి అద్భుతంగా నటించారు. తెలంగాణ సంస్కృతి-సంప్రదాయాల నేపథ్యంలో రూపొందిందీ చిత్రం.
కుటుంబ పెద్ద చనిపోయాక ఏర్పడిన పరిస్థితుల చుట్టూ ఈ కథను నడిపించారు. అలాగే చిత్రంలో రక్త సంబంధాలు, బంధుత్వ విలువలను ఎంతో బాగా చూపించారు. భీమ్స్ ఈ సినిమాకు స్వరాలను సమకూర్చారు. ఒకప్పుడు పల్లె ప్రజలంతా తెరలు కట్టి సినిమాలు చూసినట్టు.. ఈ చిత్రాన్ని ప్రస్తుత కాలంలోనూ తెలంగాణలోని పలు పల్లెల్లో ప్రదర్శించారు. ఈ సినిమాను చూసి గ్రామస్థులంతా భావోద్వేగానికి గురై కన్నీళ్లు కూడా పెట్టేసుకున్నారు. ఇప్పుడు ఈ సినిమా 'అమెజాన్‌ ప్రైమ్‌ వీడియో'లో స్ట్రీమింగ్‌ అవుతోంది.
