బాలీవుడ్ దిగ్గజ నటుడు అమితాబ్ బచ్చన్ అభిమానులకు గుడ్న్యూస్! ప్రాజెక్ట్-కె సినిమా షూటింగ్లో భాగంగా గాయపడిన అమితాబ్.. కోలుకున్నారు. దీంతో మళ్లీ షూటింగ్లో పాల్గొనేందుకు సెట్స్లోకి వచ్చారు. అందుకు సంబంధించిన ఫొటోలను ఆయనే స్వయంగా తన బ్లాగ్లో పోస్ట్ చేశారు.
సినిమా సెట్కు సంబంధించిన పలు ఫొటోలతో పాటు తాను మేకప్ వేసుకుంటున్న ఓ చిత్రాన్ని కూడా అమితాబ్ షేర్ చేశారు. క్యాప్షన్గా 'ఆఫ్ టు వర్క్'(నేను తిరిగి పనిలోకి వచ్చాను) అంటూ మూవీకి సంబంధించిన కొన్ని వివరాలను కూడా రాసుకొచ్చారు. ఓ ఫొటోలో బిగ్ బీ మూవీ టీమ్తో చర్చిస్తున్నట్లు కనిపించింది. ఈ చిత్రాలు చూసిన ఫ్యాన్స్.. హ్యాపీగా ఫీలవుతున్నారు.
80 ఏళ్ల వయసులోనూ అమితాబ్ బచ్చన్కు సినిమాల పట్ల ఉన్న డెడికేషన్ చూస్తుంటే ఎవరైనా ఆశ్చర్యపోవాల్సిందే! సెట్స్లో ఆయన ఎంతో ఎనర్జిటిక్గా కనిపిస్తుంటారు. సాధారణంగా ఆదివారం సమయాల్లో తన ఫ్యాన్స్తో రెగ్యులర్గా మీట్ అవుతుంటారు అమితాబ్. కానీ ఆరోగ్యం సహకరించకపోవడం వల్ల కొన్ని వారాల పాటు వాటిని రద్దు చేసుకున్నారు.
పాన్ ఇండియా స్టార్ ప్రభాస్ నటిస్తున్న ప్రాజెక్ట్-కె చిత్రంలోని పోరాట సన్నివేశాలను చిత్రీకరిస్తున్న సమయంలో అమితాబ్ గాయపడ్డారు. మార్చి 4న జరిగిన ఈ ఘటనలో అమితాబ్ కుడి పక్కటెముక విరిగడంతో పాటు కండరం దెబ్బతింది. దీంతో ఆయన హైదరాబాద్లోని ఏఐజీ ఆస్పత్రిలో చికిత్స తీసుకుని ముంబయిలోని తన స్వగృహానికి వెళ్లారు. వైద్యుల సూచన మేరకు కొన్ని వారాల పాటు అక్కడే విశ్రాంతి తీసుకున్నారు. గాయం దాదాపు నయం కావడంతో ఆయన తిరిగి సినిమా షూటింగ్లో కనిపించారు. ఈ చిత్రంలో బాలీవుడ్ భామ దీపికా పదుకొణె హిరోయిన్గా నటిస్తోంది.
బాలీవుడ్ బిగ్ బీ అమితాబ్ బచ్చన్ కీలక పాత్ర పోషిస్తున్న ఈ సినిమాలో దిశా పటానీ కనువిందు చేయనుంది. మహానటి దర్శకుడు నాగ్ అశ్విన్ ఈ మూవీని తెరకెక్కిస్తున్నారు. ఈ సినిమాని మూడో ప్రపంచ యుద్ధం నేపథ్యంలో రూపొందిస్తున్నట్లు సమాచారం. ఈ ప్రాజెక్ట్లో సుదీర్ఘమైన అయిదు యాక్షన్‌ బ్లాకులు ఉన్నట్లు తెలుస్తోంది. అయితే ప్రాజెక్ట్-కె సినిమా రిలీజ్ డేట్ను చిత్రబృందం ఇటీవలే ప్రకటించింది. వచ్చే ఏడాది జనవరి 12న సంక్రాంతి కానుకగా ఈ చిత్రాన్ని విడుదల చేయనున్నట్లు తెలిపింది.
ఏమైందో కానీ..!
ఈ సినిమాలో ముందుగా మిక్కీ జె మేయర్‌ను మ్యూజిక్ డైరెక్టర్గా తీసుకున్నారు. కానీ పలు కారణాలతో ఆయన స్థానంలో సంతోష్‌ నారాయణన్కు బాధ్యతలు అప్పగించారు మేకర్స్. ప్రముఖ హిందీ దర్శకుడు రిభు దర్శకత్వంలో రాబోతున్న 'సెక్షన్ 84'లోనూ అమితాబ్ బచ్చన్ నటించనున్నారు.
