పాన్ ఇండియా స్టార్ ప్రభాస్ నటిస్తున్న సినిమా 'ఆదిపురుష్'. శ్రీరామ నవమి సందర్భంగా ఈ చిత్రం నుంచి మరో అప్డేట్ ఇచ్చింది సినిమా యూనిట్. 'ఆదిపురుష్' కొత్త పోస్టర్ను విడుదల చేసింది. ఈ మేరకు 'ఆదిపురుష్' డైరెక్టర్ ఓం రౌత్ ట్విట్టర్లో పోస్టు చేశారు. దాంతోపాటు 'మంత్రం కన్నా గొప్పది నీ నామం.. జై శ్రీరామ్' అని రాసుకొచ్చారు. తెలుగుతో పాటు హిందీ, తమిళ్, కన్నడ, మలయాళంలో.. జూన్ 16న ప్రపంచవ్యాప్తంగా 'ఆదిపురుష్' విడుదల కానుంది. ఈ సినిమాలో రాముడిగా ప్రభాస్ నటించగా.. సీత పాత్రలో కృతి సనన్, లక్ష్మణుడిగా సన్నీ సింగ్ నటించారు. ఇక, సైఫ్ అలీఖాన్ రావణుడి పాత్ర పోషించారు. కాగా, ఈ సినిమా రెండో టీజర్ కూడా శ్రీరామ నవమి సందర్భంగా విడుదల చేయనున్నారని సినీ వర్గాల సమాచారం. ఈ విషయాన్ని చిత్ర యూనిట్ అధికారికంగా ప్రకటించలేదు.
'ఆదిపురుష్'కు అడ్డంకులు..
రామాయణం ఆధారంగా 'ఆదిపురుష్' తెరకెక్కుతోంది. గతేడాది దసరా వేడుకల్లో భాగంగా ఈ సినిమా టీజర్‌ను విడుదల చేసింది చిత్ర బృందం. అనూహ్యంగా దేశవ్యాప్తంగా ఉన్న సినీ అభిమానులు ఈ చిత్రంపై ఎన్నో అభ్యంతరాలు వ్యక్తం చేశారు. తాము ఊహించిన స్థాయిలో టీజర్ లేదని.. రావణాసురుడు, హనుమంతుడి లుక్స్‌, వీఎఫ్‌ఎక్స్‌ బాగోలేదని విమర్శలు చేశారు. 'ఆదిపురుష్' సినిమా మొత్తం యానిమేషన్లా ఉందని ట్రోల్ చేశారు. ముఖ్యంగా రావణుడి, ఆంజనేయుడి పాత్రలను వక్రీకరించినట్లు సోషల్ మీడియాలో కామెంట్స్ చేశారు. ఈ సినిమాలో తోలు వస్తువులు ఉపయోగించినట్లు ఆరోపించారు. అంతే కాకుండా, ఈ సినిమాకు అప్పట్లో బాయ్కాట్ సెగ కూడా తాకింది. దీంతో సంక్రాంతికి విడుదల కావాల్సిన ఈ చిత్రం వాయిదా పడింది. వెనక్కు తగ్గిన 'ఆదిపురుష్' టీమ్.. దిద్దుబాటు చర్యలు చేపట్టి.. చిత్రాన్ని రీషూట్ చేసింది. దీనికోసం ఏకంగా రూ.100 కోట్లు ఖర్చు పెట్టి మరోసారి వీఎఫ్‌ఎక్స్‌, సీజీ పనులు చేయిస్తోందని అప్పట్లో వార్తలు వచ్చాయి.
ఈ ఆరోపణలతోనే 'ఆదిపురుష్' సినిమా విడుదలను వాయిదా వేయాలని దిల్లీ కోర్టులో పిటిషన్ కూడా దాఖలైంది. ఈ మేరకు 'ఆదిపురుష్' నిర్మాత భూషణ్ కుమార్, డైరెక్టర్ ఓం రౌత్ మీద.. అడ్వకేట్ రాజ్ గౌరవ్ పిటిషన్ వేశారు. 2021లో 'ఆదిపురుష్' షూటింగ్ సెట్లో అగ్నిప్రమాదం జరిగింది. ఆ సమయంలో ప్రభాస్, సైఫ్ అలీఖాన్ సెట్లో లేరు. ప్రమాద సమయంలో దర్శకుడు ఓం రౌత్, ఇతర సిబ్బంది మాత్రమే ఉన్నారు. ఆ ఘటనలో ఎవరికీ ఎలాంటి ప్రమాదం జరగలేదు. ఇన్ని అడ్డంకులు ఎదురు కావడం వల్ల.. ఈసారైనా అనుకున్న సమయానికి 'ఆదిపురుష్' థియేటర్లలో దర్శనం ఇస్తాడో లేదో అని అభిమానులు ఆందోళన వ్యక్తం చేస్తున్నారు.
- " class="align-text-top noRightClick twitterSection" data="">
