రైతుల‌కు ఉదారంగా పరిహారం - ఆర్​ఆర్​ఆర్​ భూసేకరణపై సీఎం దిశానిర్దేశం

ఆర్​ఆర్​ఆర్​ భూసేకరణపై అధికారులకు సీఎం దిశానిర్దేశం - రైతులకు మెరుగైన పరిహారం అందేలా కలెక్టర్లు చర్యలు తీసుకోవాలన్న రేవంత్‌ - ఆర్‌ అండ్‌ బీ, అటవీ శాఖలు సమన్వయంతో ముందుకు వెళ్లాలని సూచన

CM Revanth Review on RRR : ఆర్ఆర్ఆర్‌ ఉత్తర భాగానికి సంబంధించిన భూ సేక‌ర‌ణ‌ను త్వరగా పూర్తి చేయాల‌ని ముఖ్యమంత్రి రేవంత్ రెడ్డి సంబంధిత అధికారులను ఆదేశించారు. రైతుల‌కు ప‌రిహారం ఖరారు విష‌యంలో ఉదారంగా వ్యవహరించాలన్నారు. రైతుల‌కు వీలైనంత ఎక్కువ ప‌రిహారం అందేలా ఆర్బిట్రేట‌ర్లుగా ఉన్న జిల్లా క‌లెక్టర్లు చూడాలని సీఎం సూచించారు. ఆర్ఆర్ఆర్, జాతీయ ర‌హ‌దారుల భూ సేక‌ర‌ణ‌, ప‌రిహారం, హామ్ విధానంలో ర‌హ‌దారుల నిర్మాణం, రేడియ‌ల్ రోడ్ల నిర్మాణాల‌పై స‌చివాల‌యంలో ముఖ్యమంత్రి రేవంత్ రెడ్డి స‌మీక్ష నిర్వహించారు.

భూ సేక‌ర‌ణపై స్థానిక ప్రజాప్రతినిధులతోనూ చ‌ర్చించాల‌ని అధికారులకు సీఎం తెలిపారు. త‌ర‌చూ రైతుల‌తో స‌మావేశమై ఆయా ర‌హ‌దారుల నిర్మాణాల‌తో క‌లిగే ప్రయోజనాలను వివరించి ప్రయోజనాలను వివ‌రించ‌డం ద్వారా భూ సేక‌ర‌ణను వేగ‌వంతం చేయవచ్చునని ముఖ్యమంత్రి అభిప్రాయపడ్డారు. ఆర్ఆర్ఆర్ ద‌క్షిణ‌ భాగానికి ఎన్‌హెచ్ఏఐ సూత్రప్రాయ ఆమోదం తెలిపినందున‌.. హెచ్ఎండీఏతో భూసేకరణ అలైన్‌మెంట్ చేయించాల‌ని సీఎం తెలిపారు. హైదరాబాద్‌ను కలిపే 11 రహదారులకు ఆటంకం లేకుండా రేడియల్‌ రోడ్ల నిర్మాణం చేయాలన్నారు. ఓఆర్‌ఆర్‌, ఆర్‌ఆర్‌ఆర్‌ అనుసంధానంలో ఇబ్బందులు లేకుండా చూడాలని అధికారులకు ఆదేశించారు.

అటవీ శాఖ ఎందుకు కొర్రీలు పెడుతోంది : మంచిర్యాల‌, పెద్దపల్లి, జ‌య‌శంక‌ర్ భూపాల‌ప‌ల్లి, వ‌రంగ‌ల్‌, హనుమకొండ, మ‌హ‌బూబాబాద్‌, ఖ‌మ్మం మీదుగా సాగే నాగ్‌పూర్-విజ‌య‌వాడ ఎన్‌హెచ్‌-163జీ ర‌హ‌దారి, ఆర్మూర్‌-జ‌గిత్యాల‌-మంచిర్యాల ర‌హ‌దారి ఎన్‌హెచ్‌-63, జ‌గిత్యాల‌-క‌రీంన‌గ‌ర్ ఎన్‌హెచ్ 563 ర‌హ‌దారుల నిర్మాణాలపై సీఎం రేవంత్ రెడ్డి పలు సూచనలు ఇచ్చారు. ప్రజలకు ఉప‌యోగ‌ప‌డే ర‌హ‌దారుల నిర్మాణంలో అట‌వీ శాఖ ఎందుకు కొర్రీలు పెడుతోంద‌ని అటవీ ప్రిన్సిప‌ల్ చీఫ్ క‌న్జ‌ర్వేట‌ర్ డోబ్రియ‌ల్‌ను సీఎం ప్రశ్నించారు.

పది రోజులకోసారి సమీక్ష : గ‌తంలో కొన్ని నిబంధ‌న‌లు పాటించ‌క‌పోవ‌డంతో స‌మ‌స్యలు తలెత్తాయని పీసీసీఎఫ్ బ‌దులిచ్చారు. రాష్ట్రస్థాయిలో పరిష్కారమయ్యే సమస్యలను ఇక్కడే పరిష్కారిస్తామన్నారు. అలాగే కేంద్ర అటవీ, పర్యావరణ శాఖకు సంబంధించిన అంశాలపై వెంటనే నివేదిక సమర్పించాలని సీఎం ఆదేశించారు. సమస్యల పరిష్కారానికి ఆర్ అండ్ బీ, అట‌వీ శాఖ నుంచి ఒక్కో అధికారిని ప్రత్యేకంగా నియమించాలని సీఎం సూచించారు.

ప‌ది రోజుల‌కోసారి స‌మీక్షించి త్వరగా అటవీ అనుమతులు వ‌చ్చేలా సీఎస్ పర్యవేక్షించాలని అవసరమైతే ఆర్ అండ్ బీ, అట‌వీ శాఖ మంత్రులు దిల్లీ వెళ్లి కేంద్ర మంత్రి, అధికారుల‌తో చర్చించి అనుమ‌తులు సాధించాల‌ని సీఎం స్పష్టం చేశారు. జాతీయ రహదారుల నిర్మాణంలో అండర్‌ పాస్‌ల నిర్మాణంలో జాగ్రత్తలు తీసుకోవాలని సూచించారు. రైతులు కిలోమీటర్ల దూరం వెళ్లే పరిస్థితి లేకుండా చూడాలన్నారు.

పంచాయతీల్లో 17,700 కి.మీ. రహదారులు నిర్మాణం : ఉమ్మడి జిల్లాను యూనిట్ గా తీసుకొని హైబ్రిడ్ యాన్యుటి మోడల్ హ్యామ్ విధానంలో ఆర్అండ్ బీ, పంచాయతీరాజ్ రోడ్లు నిర్మించాలని సీఎం రేవంత్ రెడ్డి తెలిపారు. ఆర్‌ అండ్‌ బీ పరిధిలో 12 వేల కి.మీ., పంచాయతీ రాజ్‌ శాఖ పరిధిలో 17,700 కి.మీ. రహదారులు నిర్మించాలని, ఒకే రకమైన నాణ్యత ప్రమాణాలతో రోడ్లు నిర్మాణం జరగాలన్నారు. కన్సల్టెన్సీల నియామ‌కం, డీపీఆర్‌ల త‌యారీ, ర‌హ‌దారుల నిర్మాణం విష‌యంలో క్రియాశీల‌కంగా వ్యవహరించాలని అధికారులను సీఎం ఆదేశించారు మూడేళ్లలో ఈ ర‌హదారుల నిర్మాణం పూర్తికావాల‌ని సీఎం స్పష్టం చేశారు.

ఆ రహదారులు మరమ్మతులు చేయాలి : వరద ప్రభావిత ప్రాంతాల్లో దెబ్బతిన్న రహదారులను మరమ్మతులు చేయాలని తెలిపారు. కూలిన వంతెనలను వెంటనే నిర్మించాలని సీఎం ఆదేశించారు. రహదారుల నిర్మాణం, మరమ్మతులకు సంబంధించి రాష్ట్ర ప్రభుత్వం వాటా నిధులు వెంటనే విడుదల చేస్తామన్నారు. అదే కేంద్రం నుంచి రావాల్సిన మ్యాచింగ్‌ గ్రాంట్‌ను పొందాలని ఆర్థిక శాఖ అధికారులకు సీఎం సూచించారు. సమీక్షలో ఉప ముఖ్యమంత్రి మ‌ల్లు భ‌ట్టి విక్రమార్క, మంత్రులు ఉత్తమ్ కుమార్ రెడ్డి, కోమ‌టిరెడ్డి వెంక‌ట్ రెడ్డి, సీతక్క, కొండా సురేఖ‌, సీఎం స‌ల‌హాదారు వేం న‌రేంద‌ర్ రెడ్డి, రాష్ట్ర రహదారి అభివృద్ధి సంస్థ ఛైర్మన్ మ‌ల్‌రెడ్డి రాంరెడ్డి, సీఎస్ శాంతి కుమారి, ఉన్నతాధికారులు పాల్గొన్నారు.