యువ కథానాయకుడు వరుణ్ సందేశ్ గాయపడ్డాడు. హైదరాబాద్ శివారులో తన తాజా చిత్రం 'ది కానిస్టేబుల్' చిత్రీకరణలో పాల్గొన్న వరుణ్ సందేశ్... పోరాట సన్నివేశాలు చిత్రీకరిస్తుండగా కాలికి బలమైన గాయం తగిలింది. వెంటనే చిత్ర బృందం సమీపంలోని ఆస్పత్రికి తరలించగా వైద్యులు ప్రాథమిక చికిత్స అందించారు. మూడువారాల పాటు విశ్రాంతి తీసుకోవాలని సూచించారు.
వరుణ్ సందేశ్ గాయపడటంతో 'ది కానిస్టేబుల్' సినిమా షూటింగును నిలిపివేస్తున్నట్లు చిత్రబృందం తెలిపింది. కాగా ఓ కానిస్టేబుల్ జీవిత కథ చుట్టూ తిరిగే అంశంతో రూపుదిద్దుకుంటున్న ఈ సినిమా దాదాపు 40 శాతం చిత్రీకరణ పూర్తి చేసుకుంది. ఆర్యన్ శుభాన్ దర్శకత్వం వహిస్తున్న ఈ సినిమా.. జాగృతి మూవీ మేకర్స్ పతాకంపై రూపుదిద్దుకుంటోంది. వరుణ్ సందేశ్ కోలుకున్న తర్వాత రెండో షెడ్యూల్లో సినిమా పూర్తి చేస్తామని చిత్ర బృందం ప్రకటించింది.
'ఢీ' షోలో సందడి చేసిన వరుణ్..
'ఢీ' సీజన్ 16 గురువారం ప్రారంభంకానుంది. హైదరాబాద్లో ఈ షో లాంచ్ ఈవెంట్ను ఘనంగా నిర్వహించారు నిర్వహకులు. అయితే ఈ ఈవెంట్కు హీరో వరుణ్ సందేశ్తో పాటు యాంకర్ వీజే సన్నీ ముఖ్య అతిథులుగా హాజరై షో లో సందండి చేశారు. దీనికి సంబంధించిన వీడియో ప్రోమోను యూట్యూబ్లో విడుదల చేశారు నిర్వాహకులు. అప్లోడ్ చేసిన కొన్నిగంటల్లోనే ఈ షో ప్రోమో లక్షల వ్యూస్తో దూసుకుపోతోంది.
ఈ ప్రోమోలో స్టేజ్పై హైపర్ ఆది కొన్ని పంచ్లు వేస్తూ అందర్నీ నవ్వించారు. అయితే ఆ సమయంలో పెళ్లి కానీ సోదరులు పెళ్లి చేసుకోవచ్చా అని హైపర్ ఆది.. వరుణ్ సందేశ్ను అడగగా.. 'పెళ్లి చేసుకోండి అదిరిపోతుంది' అంటూ కాస్త సెటైరికల్గా అన్నారు. వెంటనే హైపర్ ఆది.. ఏంటి చెమటలు వస్తున్నాయి అంటూ నవ్వులు పూయించారు. ఆ వెంటనే వీజే సన్నీ కూడా.. ఇదే ప్రశ్నను శేఖర్ మాస్టర్ను అడగగా.. మళ్లీ హైపర్ ఆది మాట అందుకుని.. 'ఆయన చేసుకున్నా పెద్ద బాధ ఏమీ ఉండదు. ఇంటా, బయటా రెండు భోజనాలు చేస్తారు' అంటూ నవ్వించారు. దీనికి స్పందించిన శేఖర్ మాస్టర్.. 'నీ యంకమ్మ.. ఆయన క్వశ్చన్ అడిగింది నన్ను..' అంటూ సరదాగా స్పందించారు.
హ్యాపీ డేస్తో పరిచయం..
వరుణ్ సందేశ్ 'హ్యాపీ డేస్' సినిమాతో తెరంగేట్రం చేశారు. ఆ తర్వాత 'కొత్త బంగారులోకం', 'కుర్రాడు' సినిమాలతో యూత్లో మంచి క్రేజ్ సంపాదించుకున్నారు. 2016లోనే తన సహ నటి వితికాను పెళ్లి చేసుకున్నారు. వీరిద్దరు కలిసి 'పడ్డానండి ప్రేమలో మరి' సినిమాలో కలిసి నటించారు. ఆ తర్వాత వరుణ్ నుంచి పెద్దగా సినిమాలు రాలేదు. మళ్లీ తెలుగు 'బిగ్బాస్ సీజన్ 3' ద్వారా ప్రేక్షకులకు దగ్గరయ్యారు. అదే సీజన్లో వరుణ్ భార్య వితికా కూడా 'బిగ్బాస్' షో లో పాల్గొన్నారు. దీంతో 'బిగ్బాస్' హౌజ్లో అడుగుపెట్టిన మొట్టమొదటి దంపతులుగా నిలిచారు. కాగా ఈ ఏడాది సందీప్ కిషన్ హీరోగా నటించిన 'మైఖేల్' సినిమాలో వరుణ్ కీలక పాత్రలో కనిపించారు.
