మత్తు.. మనిషిని చిత్తు చేస్తుంది. ఒక్కసారి ఆ మత్తుకు అలవాటుపడితే ఇక వదలడం కష్టం(Whitener Addicts in Telangana) అంటారు బాధితులు. అందుకే వాటిని నిషేధించాలని.. అరికట్టాలని చూసినా.. దానికి మరో ప్రత్యామ్నాయం వెతుక్కుంటున్నారు. డ్రగ్స్ పోతే గంజాయి, గంజాయిని అడ్డుకుంటుంటే వైట్నర్(Whitener Addicts in Telangana). గంజాయి వాడకంపై పోలీసులు ఉక్కుపాదం మోపుతుంటే వ్యసనపరులు మత్తు కోసం వైట్నర్కు అలవాటుపడుతున్నారు. ఆ మత్తులో హత్యలు కూడా చేస్తున్నారు. తాజాగా ఇలాంటి కేసులు రాష్ట్రంలో వెలుగుచూశాయి.
గంజాయి రవాణాకు అడ్డుకట్ట
రాష్ట్రాన్ని మాదక ద్రవ్యాల రహితంగా తీర్చిదిద్దాలన్న ముఖ్యమంత్రి ఆదేశాల మేరకు గంజాయి క్రయవిక్రయాలపై పోలీసులు, ఎక్సైజ్ అధికారులు గట్టి నిఘా పెట్టారు. పక్కా సమాచారం మేరకు దాడులు చేస్తూ గంజాయి ముఠాలను అరెస్ట్ చేస్తున్నారు. పోలీసుల దాడుల్లో భారీగా సరకు పట్టుబడుతోంది. సరఫరాదారులను అరెస్ట్ చేసి కటకటాల వెనక్కి పంపిస్తున్నారు. తరచూ గంజాయి విక్రయిస్తూ పట్టుబడే వారిపై పోలీసులు కేసు నమోదు చేస్తున్నారు. ఆంధ్రా, ఒడిశా సరిహద్దు నుంచి గంజాయి రాకుండా ప్రత్యేక చర్యలు చేపట్టారు. హైదరాబాద్ మీదుగా మహారాష్ట్ర, మధ్యప్రదేశ్, గుజరాత్, రాయచూర్‌కి సరఫరా అవుతుండటంతో విజయవాడ జాతీయరహదారిపై ముమ్మరంగా తనిఖీలు చేస్తుండటంతో రాజధాని పరిసర ప్రాంతాల్లో క్రయవిక్రయాలు నిలిచిపోయాయి. ఇదే సమయంలో గుట్కా విక్రయాలను పోలీసులు అడ్డుకుంటున్నారు. హైదరాబాద్లోని మూడు కమిషనరేట్ల పరిధిలో రోజూ పదుల సంఖ్యలో గుట్కా కేసులు నమోదవుతున్నాయి.
మత్తు కోసం వైట్నర్
గంజాయి, గుట్కా విక్రయాలు నిలిచిపోవవడంతో... వాటికి బానిసైన వాళ్లు ఇతర మత్తు పదార్థాలను ఎంచుకుంటున్నారు. వైట్నర్ విరివిగా దొరుకుతుండటంతో కొనుగోలు చేసి వినియోగిస్తున్నారు. కాచిగూడ, సికింద్రాబాద్, నాంపల్లి, ఎంజీబీఎస్, జేబీఎస్, చార్మినార్, బహదూర్పుర, కోఠి, ఉప్పల్, మైలార్దేవ్ పల్లి, రాజేంద్రనగర్, లంగర్ హౌస్, ఆసిఫ్ నగర్, ఆర్టీసీ క్రాస్ రోడ్, తార్నాక, కుషాయిగూడ ప్రాంతాల్లో వైట్నర్(Whitener Addicts in Telangana)ను ఎక్కువగా ఉపయోగిస్తున్నారు. యాచకులు, చిత్తు కాగితాలు సేకరించే వాళ్లు, వీధులపై పడుకునే వాళ్లు ఎక్కువగా వైట్నర్ను వినియోగిస్తున్నారు. రైల్వే స్టేషన్ పరిసరాలు, పట్టాల పక్కన ఉంటూ వైట్నర్ సేవిస్తున్నారు. వైట్నర్ మత్తులో రహదారుల పక్కన ఎక్కడపడితే అక్కడ పడిపోతున్నారు.
వైట్నర్ మత్తులో హత్య
వైట్నర్ను ఆఫీసు కార్యకలాపాల్లో ఎక్కువగా వినియోగిస్తుంటారు. ఏమైనా తప్పులు దొర్లినా... పత్రాల్లో ఉన్న సమాచారాన్ని సరిదిద్దాలనుకున్నా... ఈ ద్రావణం వినియోగిస్తుంటారు. వైట్నర్(Whitener Addicts in Telangana) తయారు చేసేందుకు ఉపయోగించే రసాయనం కొంత మత్తును కలిగిస్తుంది. దీంతో కొంతమంది దీని బారిన పడుతున్నారు. మద్యం కొనే స్తోమత లేనివాళ్లు... గంజాయి కూడా మార్కెట్లో దొరకకపోవడంతో... ఇప్పుడు ఎక్కువ మంది వైట్నర్ను వినియోగిస్తున్నారు. మూడు రోజుల క్రితం నాంపల్లి, హబీబ్ నగర్ పీఎస్ పరిధిలో ఇద్దరు యాచకులు హత్యకు గురయ్యారు. ఇద్దరినీ తలపై రాయితో మోది ఒకే తరహాలో హత్య చేయడంతో పోలీసులు సీసీ కెమెరాలను పరిశీలించారు. ఇద్దరినీ హత్య చేసింది ఒకే వ్యక్తి అని పోలీసుల దర్యాప్తులో తేలింది. వైట్నర్కు బానిసైన ఖదీర్ జంట.. హత్యలు చేసినట్లు గుర్తించారు. కర్ణాటకకు చెందిన ఖదీర్ చిత్తు కాగితాలు ఏరుకుంటూ ఫుట్పాత్లపై నిద్రిస్తుంటాడు. 2019లోనూ ఖదీర్ నాంపల్లిలో ఒక వ్యక్తిని ఇదే తరహాలో హత్య చేశాడు.
మెడకు చున్నీ బిగించి
8 నెలల క్రితం చంద్రాయణ్ గుట్ట పీఎస్ పరిధిలో రేష్మా అనే మహిళ.. ఆమె భర్త సోహైల్ను మెడకు చున్నీ బిగించి హత్య చేసింది. వైట్నర్కు బానిసైన భార్యాభర్తలు గొడవపడి మత్తులో హత్య చేసినట్లు పోలీసుల దర్యాప్తులో తేలింది. గాంధీనగర్ పీఎస్ పరిధిలోనూ రెండు నెలల క్రితం ఇద్దరు యాచకుల మధ్య జరిగిన గొడవ హత్యకు దారి తీసింది. హతుడు వైట్నర్కు బానిసైనట్లు పోలీసుల దర్యాప్తులో తేలింది.
నేరాల దృష్ట్యా.. ద్రవరూపంలో ఉండే వైట్నర్ విక్రయాలపై పోలీసులు ఆంక్షలు విధించారు. అయినా జిరాక్స్ సెంటర్లు, జనరల్ స్టోర్లు, బుక్ సెంటర్లలో విక్రయాలు జరుగుతూనే ఉన్నాయి. మత్తుకు బానిసలవుతున్న దృష్ట్యా వైట్నర్పై పోలీసులు మరింత కఠినంగా వ్యవహరించాల్సిన అవసరం ఉంది.
ఇదీ చదవండి: Etela Rajender Comments: కుట్రలు, డబ్బును నమ్ముకున్న హరీశ్‌.. వాటికే బలవుతారు: ఈటల
