DEAD Bodies in Hyderbad: నగర శివారుల్లో మృతదేహాల కలకలం.. హత్యాలా.. ఆత్మహత్యాలా..?

హైదరాబాద్ నగర శివారుల్లో గుర్తు తెలియని మృతదేహాల(unknown dead bodies in hyderabad) లభ్యం కలకలం రేపుతోంది. ఎల్బీనగర్‌ పరిధిలో ఐదు రోజుల్లోనే మూడు శవాలు లభించడం(unknown dead body found)... పోలీసులకు కంటిమీద కునుకు లేకుండా చేస్తున్నాయి. అసలు నగర శివారుల్లో ఏం జరుగుతుందో అంతుచిక్కని పరిస్థితి నెలకొంది. ఇవి హత్యలా...? ఆత్మహత్యలా...।? అనే కోణంలో లోతైన దర్యాప్తు చేస్తున్న పోలీసులు.... జనసంచారం తక్కువ ఉన్న ప్రాంతాల్లో గస్తీ పెంచే పనిలో పడ్డారు.

హైదరాబాద్‌ శివారులో వరుసగా గుర్తు తెలియని మృతదేహాలు(unknown dead bodies in hyderabad) లభ్యమవుతున్నాయి. ఈ నెల 12వ తేదీన రెండు శవాలను పోలీసులు గుర్తించారు. రంగారెడ్డి జిల్లా అబ్దుల్లాపూర్‌మెట్‌ బాహ్య వలయ రహదారి సర్వీస్‌ రోడ్డు నుంచి కోహెడ వెళ్లే దారి సమీపంలోని కాలువలో.... వివాహిత మృతదేహం దొరికింది. మృతురాలు వయస్సు 30 ఏళ్లు ఉంటుందని పోలీసులు నిర్ధారించారు. మహిళ మృతికి గల కారణాలను లోతుగా దర్యాప్తు చేస్తున్నారు. ఘటనాస్థలానికి డాగ్‌ స్క్వాడ్‌తో పాటు క్లూస్‌ టీంలను తీసుకువచ్చి ఆధారాలు సేకరించారు. హత్య చేసి కాలువలో పడేశారా....? లేదా ఆత్మహత్యా... ? అనే కోణంలో విచారిస్తున్నారు. మృతదేహాన్ని పోస్టుమార్టం నిమిత్తం ఉస్మానియా ఆస్పత్రికి తరలించారు. పోస్టుమార్టం నివేదిక వస్తేనే... అసలు నిజాలు బయటకు వస్తాయని పోలీసులు భావిస్తున్నారు.

ఎల్బీ నగర్‌లోని బైరామల్‌ గూడ వద్ద నాలాలో అదేరోజు ఓ గుర్తు తెలియని యువకుడి మృతదేహం లభ్యమైంది. యువకుడి ముఖం చిధ్రమై గుర్తుపట్టని స్థితిలో ఉండటంతో పలు అనుమానాలు వ్యక్తమవుతున్నాయి. హత్యా...? ఆత్మహత్యా..? తేల్చలేకపోయిన పోలీసులు పోస్టుమార్టం నివేదకతోనే నిర్ధారణవుతుందని వెల్లడించారు. గతంలో పాతబస్తీలో ఇదే నాలా పక్కన హత్య చేసి తగులపెట్టిన ఘటనలు ఉండటంతో పోలీసులు దర్యాప్తు వేగవంతం చేశారు. మరోవైపు.. మంగళవారం ఇబ్పహీంపట్నం శేరిగూడాలోని ఓ వెంచర్‌లో ఓ వ్యక్తి మృతదేహం కుళ్లిన స్థితిలో ఉండటం పోలీసులు గుర్తించారు. పక్కనే కత్తి, ఖాళీ మద్యం సీసా పడి ఉండటంతో హత్యగా అనుమానిస్తున్నారు. వారం రోజులుగా వెంచర్‌కు ఎవరెవరూ వచ్చార అనే వివరాలు సేకరించి కేసును తేల్చే పనిలో పడ్డారు.

నగర శివారులో వరుసగా వెలుగులోకి వస్తున్న మృతదేహాల పట్ల చుట్టుపక్కల ప్రజలు ఆందోళన చెందుతున్నారు. ఓఆర్‌ఆర్‌ సర్వీస్ రోడ్​లో పోలీసుల గస్తీ ముమ్మరం చేసి ఇలాంటి ఘటనలకు తావివ్వకుండా చూడాల్సిన అవసరముందని పలువురు పేర్కొంటున్నారు. ఓఆర్​ఆర్​ సర్వీసు రోడ్డులో పోలీసులు పోకస్​ పెంచారు.

ఇవీ చూడండి: