గద్వాల జిల్లాలో ఘోర రోడ్డు ప్రమాదం చోటుచేసుకుంది. ద్విచక్రవాహనంపై నుంచి కిందపడిన వారి మీదుగా ఓ వాహనం దూసుకెళ్లింది. ఈ ఘటనలో ఇద్దరు చిన్నారులు అక్కడికక్కడే మృతి చెందగా.. వారి తండ్రి తీవ్రంగా గాయపడ్డాడు.
ఓ వ్యక్తి తన ఇద్దరు కుమార్తెలతో మానవపాడు మండలం చెన్నిపాడు నుంచి కర్నూలు వెళ్తున్నాడు. ఉండవల్లి మండలం ఉత్తరాపూర్ చేరుకోగానే.. జాతీయరహదారిపై ద్విచక్రవాహనంపై వెళ్తున్న వారిని లారీ ఢీకొట్టింది.
లారీ ఢీకొట్టడం వల్ల బైక్పై ఉన్న వ్యక్తి, అతడి కుమార్తెలు కిందపడ్డారు. అదే సమయంలో పక్క నుంచి వస్తున్న వాహనం ఇద్దరు బాలికలపై నుంచి దూసుకెళ్లింది. ఈ ఘటనలో వారిద్దరు అక్కడికక్కడే మృతి చెందగా.. తండ్రి తీవ్రంగా గాయపడ్డాడు.
సమాచారం అందుకున్న పోలీసులు ఘటనాస్థలికి చేరుకున్నారు. ఆ వ్యక్తిని అంబులెన్స్లో స్థానిక ఆస్పత్రికి తరలించారు. పోస్టుమార్టం నిమిత్తం బాలికల మృతదేహాలను ప్రభుత్వాస్పత్రికి పంపించారు. కేసు నమోదు చేసుకున్న పోలీసులు దర్యాప్తు చేస్తున్నారు.
