కొవిడ్ బాధితులకు ఇచ్చే రెమ్డెసివిర్ ఇంజక్షన్లను బ్లాక్ మార్కెట్లో అధిక ధరలకు విక్రయిస్తున్న ముగ్గురిని నార్త్ జోన్ టాస్క్ ఫోర్స్ పోలీసులు అరెస్ట్ చేశారు. వారి వద్ద నుంచి రూ.2.40 లక్షల విలువచేసే 12 రెమ్డెసివిర్ ఇంజక్షన్లను స్వాధీనం చేసుకున్నారు. కూకట్పల్లిలోని హెటిరో హెల్త్ కేర్లో బిజినెస్ మేనేజర్ బాలాజీనగర్కు చెందిన షేక్ సలీం జాఫర్(32), ఫీల్డ్ సేల్స్ ఆఫీసర్ బాతాల వెంకటేష్ (27) కరోనా చికిత్సలో వినియోగించే రెమ్డెసివిర్ ఇంజక్షన్లకు ఉన్న డిమాండ్ను సొమ్ము చేసుకునేందుకు ఓ ప్రణాళిక రూపొందించారు.
అల్కెమ్ ఫార్మసీలో మెడికల్ రిప్రజెంటెటీవ్గా పనిచేస్తున్న రామ్నగర్కు చెందిన జొన్నల శరణ్‌తో జత కలిశారు. రూ.2,500 విలువ చేసే ఒక రెమ్డెసివిర్ ఇంజక్షన్‌ శరణ్కు రూ.15 వేలకు విక్రయిస్తున్నారు. వీటిని రూ.20 వేలకు కొవిడ్ బాధితులకు, మెడికల్ షాపులకు అతను సరఫరా చేస్తున్నాడు. విశ్వసనీయ సమాచారం అందుకున్న నార్త్ జోన్ టాస్క్ ఫోర్స్ ఇన్స్పెక్టర్ నాగేశ్వర్‌రావు తన సిబ్బందితో కలిసి దాడులు నిర్వహించారు. నిందితులు షేక్ సలీం జాఫర్, బాతాల వెంకటేశ్, జొన్నల శరణ్ను బేగంపేటలో అరెస్టు చేశారు. తదుపరి దర్యాప్తు కోసం వారిని బేగంపేట పోలీసులకు అప్పగించారు.
