సికింద్రాబాద్లోని జవహర్నగర్ పోలీస్స్టేషన్ పరిధిలో దారుణం జరిగింది. నవరస గార్డెన్ వెనుక ఉన్న మోహన్రావు కాలనీలో అశోక్(29) అనే స్విగ్గీ డెలివరీ బాయ్ ఉరేసుకుని మృతిచెందాడు. ఉరేసుకునే ముందు సెల్ఫీ వీడియో తీసుకుని మరీ మిత్రులకు పంపించాడు. ఈ వీడియోలో కన్నయ్య అని సంబోధిస్తూ.. ఓ వ్యక్తికి సందేశం ఇచ్చాడు. అయితే అది ఎలాంటి సందేశమన్నది స్పష్టంగా తెలియకపోవటంతో ఆత్మహత్యకు గల కారణం తెలియరాలేదు.
అశోక్కు మూడేళ్ల కిందట వివాహం జరిగింది. ఉదయం అతడి భార్య తల్లిదండ్రులు.. నగరంలో ఓ పని నిమిత్తం వచ్చారు. ఆ పని ముగించుకుని సాయంకాలం తిరిగి ఇంటికి వచ్చే లోపే అశోక్ విగతజీవిగా వేలాడుతూ కనిపించాడు. ఇంట్లో ఎవరూ లేని సమయంలో అశోక్ ఆత్మహత్య చేసుకుని మరణించాడు. వెంటనే కుటుంబ సభ్యులు పోలీసులకు సమాచారం ఇచ్చారు.
ఘటనాస్థలికి చేరుకున్న పోలీసులు.. పరిశీలించారు. కేసు నమోదు చేసి.. అన్ని కోణాల్లో దర్యాప్తు చేస్తున్నారు. అయితే... అశోక్ ఎందుకు ఆత్మహత్య చేసుకున్నాడన్న విషయం తెలియాల్సి ఉంది. సెల్ఫీ వీడియోలో మాట్లాడుతూ.. తన నానమ్మ దగ్గరికి వెళ్లిపోతున్నట్టు చెప్పటం.. ఉరివేసుకుని ప్రాణాలు వదిలే దృశ్యాలు అందర్ని కలచివేస్తున్నాయి.
ఇదీ చూడండి:
