యథేచ్ఛగా ఇసుక అక్రమ రవాణా.. అటువైపే చూడని అధికారులు

అనుమతులు లేకుండా ఒకరు.. అనుమతుల పేరుతో ఇంకొకరు.. పట్టపగలే దోచుకుపోయేది మరికొందరు.. రాత్రివేళల్లో దొంగతనంగా దోచుకెళ్లేవారు ఇంకొందరు. మార్గాలు ఏవైనా ఉమ్మడి మహబూబ్‌నగర్ జిల్లాలో ఇసుక అక్రమ రవాణా యథేచ్ఛగా సాగుతోంది. ఇసుక కనిపిస్తే చాలు జిల్లా సరిహద్దులు దాటించేస్తున్నారు. అధికారులు చూసిచూడనట్లు వ్యవహరించడం వల్ల ప్రభుత్వ ఆదాయానికి కోట్ల రూపాయల గండిపడుతోంది.

దుందుభీ వాగు, పెద్ద వాగు, ఊక చెట్టువాగు... వాగు ఏదైతేనేం... ఇసుక రాశులుంటే చాలు... పదుల కొద్ది ట్రాక్టర్లు, టిప్పర్లు గద్దల్లా వాలిపోతాయి. చూస్తుండగానే వాహనాల్ని నింపి ఇసుకను తరలించుకుపోతాయి. ఉమ్మడి మహబూబ్‌నగర్ జిల్లాలో ఇసుక అక్రమ రవాణా జోరుకు ఇవే సాక్ష్యాలు.

అక్రమ రవాణా అని తెలిసినా..

మహబూబ్​నగర్, నాగర్ కర్నూల్ జిల్లాల పరిధిలో బాలానగర్, జడ్చర్ల, మిడ్జిల్, తిమ్మాజీపేట, కల్వకుర్తి, వంగూరు, తెలకపల్లి ఉప్పునూతలలో దుందుభీ వాగు సుమారు 65 కిలోమీటర్ల మేర ప్రవహిస్తోంది. ఇసుక రాశులున్న ప్రతిచోటా అక్రమంగా ఇసుకను తరలిస్తున్నారు. కొన్ని చోట్ల ప్రభుత్వ అవసరాల కోసమని 10 ట్రాక్టర్లకు అనుమతులు తెచ్చుకుని వందల ట్రాక్టర్లు తరలిస్తున్నారు. జరిగేది అక్రమ రవాణా అని తెలిసినా చర్యలు తీసుకోకపోవడం వల్ల.. ఫిర్యాదు చేసేందుకు సైతం జనం ముందుకు రావడం లేదు.

నారాయణపేట జిల్లాలో..

నారాయణపేట జిల్లాలో పెద్దవాగు వెంట ఇసుక అక్రమ రవాణా జోరుగా సాగుతోంది. ముఖ్యంగా ఊట్కూరు మండలం మల్లెపల్లి, నాగిరెడ్డిపల్లి, పగిడిమర్రి, వల్లంపల్లి, మక్తల్, మాగనూరు, పసుపుల, చిట్యాలలో అక్రమ రవాణా జోరుగా కొనసాగుతోంది. రాత్రివేళ వాగుల్లోకి ట్రాక్టర్లు వెళ్లడం, ఇసుక నింపి ఏదో చోట డంప్ చేయడం, తెల్లారేసరికి టిప్పర్లతో అక్కడ నుంచి గద్వాల, ఆత్మకూరు, అమరచింత, హైదరాబాద్ సహా పలు ప్రాంతాలకు తరలిస్తున్నారు. వాగుల్లో మనిషిలోతు ఇసుక తవ్విన ఆనవాళ్లని చూస్తే అక్రమ రవాణా ఎలా సాగుతుందో తెలుసుకోవచ్చు. నారాయణపేట జిల్లాలో ఏడాదికాలంగా నిత్యం టాస్క్ ఫోర్స్ అధికారులు ఇసుక లారీలను పట్టుకుంటున్నా, అక్రమదందాకు అడ్డుకట్ట పడటం లేదంటే పరిస్థితిని అర్థం చేసుకోవచ్చు.

తూతూ మంత్రంగా చర్యలు..

మహబూబ్‌నగర్, వనపర్తి జిల్లాలోని వాగుల పరిస్థితీ అదే. అడ్డాకుల, మూసేపేట, సీసీ కుంట, కోయల్ కొండ మండలాల్లోని వాగులు అక్రమ రవాణాకు అడ్డాగా మారాయి. అనుమతుల పేరిట ఇసుకను తవ్వడం, వ్యాపారం కోసం ఇతర ప్రాంతాలకు తరలించడం పరిపాటిగా మారింది. ఎవరైనా ఫిర్యాదు చేస్తే తూతూ మంత్రంగా చర్యలు తీసుకోవడం ఆ తర్వాత పట్టించుకోకపోవడం అధికారులకు మామూలే. ఇంతా జరుగుతున్నా పోలీసులు, రెవెన్యూ, మైనింగ్ అధికారులు తమది బాధ్యత కాదన్నట్లుగా వ్యవహరించడం విమర్శలకు తావిస్తోంది.

టిప్పర్​ ఇసుక ధర రూ.55 వేలు!

ఉమ్మడి మహబూబ్​నగర్ జిల్లాలో రాష్ట్ర ఖనిజాభివృద్ధి సంస్థ ద్వారా ఏడాది కాలంగా 11 రీచ్‌ల ద్వారా లక్షా 84 వేల క్యూబిక్ మీటర్ల ఇసుకను విక్రయించారు. తద్వారా ప్రభుత్వానికి పది కోట్లు, స్థానిక సంస్థలకు 73 లక్షల ఆదాయం వచ్చింది. అలాంటిది ఉమ్మడి మహబూబ్​నగర్ జిల్లాలో 50కి పైగా ప్రాంతాల నుంచి ఇసుక అక్రమంగా తరలి వెళ్లిపోతోంది. ప్రభుత్వ ఖజానాకు వందల కోట్ల రూపాయల గండి పడుతోంది. ఒక్కో టిప్పర్ ఇసుక ధర 55 వేలకు పైగా పలుకుతోందంటే.. ఇసుక అక్రమ రవాణా ద్వారా ఇసుకాసురుల సంపాదన ఎంతో అంచనా వేయవచ్చు. ఇప్పటికైనా అధికారులు స్పందించి ప్రభుత్వాదాయానికి, పర్యావరణానికి గండి పడకుండా చర్యలు తీసుకోవాల్సిన అవసరం ఎంతైనా ఉంది.

ఇవీచూడండి: గంజాయి మత్తులో యువత భవిత చిత్తు!