మహబూబ్నగర్ జిల్లా జడ్చర్లకు చెందిన విద్యార్థిని (17) గత నెల డిసెంబరులో హైదరాబాద్‌లోని బంధువుల ఇంట్లో పెళ్లికి వెళ్లింది. ఆ సమయంలో మలక్‌పేట్‌లోని ముస్తఫానగర్‌కు చెందిన సబీల్‌ (21) పరిచయమయ్యాడు. బాలిక ఫోన్‌ నంబరు తీసుకొని తరచూ చాటింగ్‌ చేయసాగాడు. ఈ నెల 2వ తేదీ హైదరాబాద్‌కు చెందిన మిత్రులు సయ్యద్‌ తాలిబ్‌ (19), సయ్యద్‌ అల్తాఫ్‌ (20)తో కలసి జడ్చర్లకు వచ్చాడు. బాలికకు ఫోన్‌ చేసి మాయమాటలు చెప్పి కొత్త బస్టాండుకు రప్పించాడు.
అనంతరం సమీపంలోని ఓ లాడ్జికి తీసుకెళ్లి.. మంచినీళ్లలో మత్తుమందు కలిపి.. ఆమెపై సబీల్‌ అత్యాచారం చేశాడు. దీన్ని సెల్‌ఫోన్లో చిత్రీకరించి తర్వాత బంధువుల ఫోన్లకు పంపాడు. అతని మిత్రులు ఇద్దరు కూడా వీడియోను అడ్డం పెట్టుకొని బాలికను వేధించసాగారు. ఈ క్రమంలో బాధితురాలి కుటుంబ సభ్యుల సెల్‌ఫోన్‌కు కూడా ఆ వీడియో రావడంతో బాలిక తండ్రి ఆదివారం జడ్చర్ల పోలీసులకు ఫిర్యాదు చేశారు. నిందితులు ముగ్గురిని సోమవారం హైదరాబాద్‌లో అరెస్టు చేసి, జడ్చర్లకు తీసుకొచ్చి రిమాండ్‌కు తరలించారు.
